اقش كونگرەسىنىڭ وكىلدەر پالاتاسى پرەزيدەنت دونالد ترامپتان يرانعا قارسى اسكەري ءىس-قيمىلداردى توقتاتۋدى تالاپ ەتەتىن قاراردى قابىلدادى. بۇل تۋرالى CNN جازدى، دەپ حابارلايدى «ادىرنا» ءتىلشىسى.
اگەنتتىك مالىمەتىنشە، بۇل — ارالىق سايلاۋعا بىرنەشە اپتا قالعاندا اكىمشىلىكتىڭ قاقتىعىسقا قاتىستى ساياساتىنا نارازىلىق بىلدىرگەن ماڭىزدى ساياسي قادام.
وكىلدەر پالاتاسى ترامپتان يرانمەن قاقتىعىس ايماعىنان اسكەردى شىعارۋدى ءۇشىنشى رەت تالاپ ەتىپ وتىر. الايدا دەموكراتتار بۇل جولعى داۋىس بەرۋدى ەرەكشە ماڭىزدى دەپ سانايدى، ويتكەنى قارار قاراشاداعى سايلاۋ الدىنداعى تومەنگى پالاتانىڭ سوڭعى شەشىمدەرىنىڭ ءبىرى بولدى.
باستامانى جەتى رەسپۋبليكاشىل كونگرەسسمەن قولداعان. بۇعان دەيىنگى ەكى ۇقساس قارارعا رەسپۋبليكالىق پارتيانىڭ تەك ءتورت مۇشەسى عانا داۋىس بەرگەن ەدى. بۇل جولى دەموكراتتارعا بۇرىن قولداۋ كورسەتپەگەن ءۇش رەسپۋبليكاشىل – مارياننەتت ميللەر-ميكس، زاك نانن جانە نەنسي مەيس قوسىلعان.
رەسمي تۇردە وكىلدەر پالاتاسىنداعى رەسپۋبليكاشىلدار باسشىلىعى پارتيالاستارىنا مۇنداي قارارلار بويىنشا قالاي داۋىس بەرۋ كەرەكتىگىن مىندەتتەمەيدى. دەگەنمەن، دونالد ترامپ بۇل ماسەلەدە وزىنە قارسى داۋىس بەرگەن رەسپۋبليكاشىلداردى بىرنەشە رەت قاتاڭ سىنعا العان ەدى.
سونىمەن قاتار اقش وكىلدەر پالاتاسى دونالد ترامپقا يمپيچمەنت جاريالاۋ تۋرالى ۇسىنىستى قاراۋعا جىبەرۋگە قارسى داۋىس بەرگەن. قاراردى كەيىنگە قالدىرۋدى 232 كونگرەسسمەن قولداسا، 147 دەپۋتات قارسى شىققان. تاعى 46 دەموكرات داۋىس بەرۋدەن قالىس قالعان.
باستاما اۆتورى – تەحاس شتاتىنان سايلانعان دەموكرات كونگرەسسمەن ەل گرين. ول دونالد ترامپتى يمميگراتسيالىق قىزمەتتەردى باسقارۋ كەزىندە ازاماتتىق بوستاندىقتاردى بۇزدى دەپ ايىپتاپ وتىر.
