اقش-تا ءولىم جازاسىنا كەسىلگەن 50 جاستاعى كريستا پايك ولىمگە اكەلەتىن ەكى ينەكتسيادان كەيىن ءتىرى قالىپ، ەسىن جيعان. بۇل تۋرالى ونىڭ ادۆوكاتتارى مالىمدەدى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
ايتۋىنشا، پايك قازىرگى ۋاقىتتا تەننەسسي شتاتىنداعى اۋرۋحانانىڭ جانساقتاۋ بولىمىندە ەم الىپ جاتىر. وتكەن اپتادا وعان ءولىم جازاسىن ورىنداۋ ماقساتىندا ەكى رەت پەنتوباربيتال پرەپاراتى ەنگىزىلگەن. الايدا ءدارى ونىڭ ءومىرىن جالماماعان. وسى ۋاقىت بويى دارىگەرلەر ونىڭ اعزاسىنان پەنتوباربيتالدى شىعارۋمەن اينالىسقان.
اقش زاڭناماسىنا سايكەس، ءولىم جازاسىنا كەسىلگەن ادامعا مۇنداي ەكى ينەكتسيا عانا جاسالۋى مۇمكىن. ادۆوكاتتاردىڭ مالىمەتىنشە، پايك العان جاراقاتتارىنا قاراماستان، اۋرۋحانادا كىسەن مەن شىنجىرعا بايلانىپ جاتىر.
ءولىم جازاسىن ورىنداۋ بارىسىندا قورعاۋشىلار ايەلدىڭ تامىرلارىنىڭ اناتوميالىق ەرەكشەلىكتەرى پروتسەدۋرانى قيىنداتىپ، وعان ارتىق ازاپ اكەلۋى مۇمكىن ەكەنىن ەسكەرتكەن بولاتىن.
ادۆوكاتتاردىڭ ايتۋىنشا، ەكى رەت ورىندالعان ءولىم جازاسى ارەكەتىنەن كەيىن ءتىرى قالىپ، ەسىن جيعان ادامنىڭ جاعدايى مەديتسينا تاريحىندا بۇرىن-سوڭدى بولماعان وقيعا سانالادى. دارىگەرلەر ونىڭ جاعدايىنا قاتىستى ناقتى بولجام جاساي الماي وتىر، الايدا ۇزاق ۋاقىتقا سوزىلاتىن وڭالتۋ كەزەڭى كۇتىلەدى.
قورعاۋشىلاردىڭ مالىمەتىنشە، كريستا پايك — اقش تاريحىندا ءولىم جازاسىن تولىق ورىنداۋ ارەكەتىنەن كەيىن ءتىرى قالعان العاشقى ادام.
تەننەسسي بيلىگى ءولىم جازاسىن قايتا ورىنداۋعا قاتىستى مالىمدەمە جاسامادى. دەگەنمەن، شتات گۋبەرناتورى بيلل لي جىل سوڭىنا دەيىن بارلىق ءولىم جازاسىن ورىنداۋدى توقتاتقان. سونىمەن قاتار شتاتتىڭ قىلمىستىق-اتقارۋ جۇيەسىنىڭ باسشىسى قىزمەتىنەن كەتەتىنىن مالىمدەگەن.
پايكتىڭ ادۆوكاتى ستيۆەن فەررەل گۋبەرناتوردى ونىڭ ءولىم جازاسىن ءومىر بويىنا باس بوستاندىعىنان ايىرۋ جازاسىنا اۋىستىرۋعا شاقىردى. ايتۋىنشا، پايك 30 جىلدان استام ۋاقىت تۇرمەدە وتىرعان، ونىڭ كوپ بولىگىن جالعىز كامەرادا وتكىزگەن.
كريستا پايك 18 جاسىندا سول كەزدەگى 17 جاستاعى جىگىتى تاداريل شيپپپەن بىرگە 19 جاستاعى كوللين سلەممەردى ازاپتاپ ولتىرگەنى ءۇشىن سوتتالعان. ول تەننەسسي شتاتىندا سوڭعى 200 جىلدا ءولىم جازاسىنا كەسىلەتىن العاشقى ايەل بولۋى ءتيىس ەدى.
اقش-تىڭ پەنيتەنتسيارلىق جۇيەسى ازىرگە ەكى ولىمگە اكەلەتىن ينەكتسيانىڭ نەگە اسەر ەتپەگەنى تۋرالى رەسمي تۇسىنىكتەمە بەرگەن جوق.
قورعاۋشىلارمەن جۇمىس ىستەگەن انەستەزيولوگ دجوەل زيۆوتتىڭ پىكىرىنشە، ەنگىزىلگەن ەكى دوزا پەنتوباربيتال ادامنىڭ ولىمىنە جەتكىلىكتى بولعان. ونىڭ بولجامىنشا، پرەپارات كوكتامىرعا ەمەس، تەرى استىنا جىبەرىلگەن بولۋى مۇمكىن. سونىڭ سالدارىنان ءدارى قان اينالىمىنا تۇسپەي، تەرى استىنداعى تىندەرگە تاراعان.
ادۆوكاتتار بۇعان دەيىن پايكتىڭ دەنساۋلىق جاعدايى مەن تامىرلارىنىڭ ۇساق بولۋى ءولىم ينەكتسياسى كەزىندە قاجەتسىز اۋىرسىنۋ مەن ازاپقا اكەلۋى مۇمكىن ەكەنىن ايتقان.
دارىگەرلەر ازىرگە ەكى ولىمگە اكەلەتىن دوزانىڭ ونىڭ دەنساۋلىعىنا قانداي سالدار تيگىزەتىنىن ناقتى بىلمەيدى. مامانداردىڭ پىكىرىنشە، وعان مەديتسينالىق كومەكتىڭ كەش كورسەتىلۋى مي زاقىمىنا اكەلۋى مۇمكىن. مۇنى انىقتاۋ ءۇشىن تولىق نەۆرولوگيالىق تەكسەرۋ قاجەت.
فوردحەم ۋنيۆەرسيتەتىنىڭ پروفەسسورى ءارى كريمينولوگ دەبورا دەننو بۇل جاعدايدى «بۇرىن-سوڭدى بولماعان وقيعا» دەپ اتادى. ونىڭ ايتۋىنشا، پايك ءولىم ينەكتسياسىنان كەيىن امان قالعان سەگىزىنشى ادام بولعانىمەن، الدىڭعى جەتى جاعدايدا ورىنداۋشىلار سوتتالعانداردىڭ تامىرىنا پرەپاراتتى ەنگىزە الماعان. ال پايك — اعزاسىنا ۋلى زات ناقتى ەنگىزىلگەننەن كەيىن ءتىرى قالعان جالعىز ادام.
