اقش تاۋەلسىزدىگىنىڭ 250 جىلدىعىنا وراي پرەزيدەنت دونالد ترامپتىڭ بەينەسى بەينەلەنگەن جاڭا 1 دوللارلىق مونەتا جاقىن ارادا اينالىمعا شىعادى. بۇل تۋرالى قارجى ءمينيسترى سكوتت بەسسەنت X جەلىسىندەگى پاراقشاسىندا جازدى، دەپ حابارلايدى «ادىرنا» ءتىلشىسى.
«اقش مونەتالار سارايى بوستاندىقتىڭ ماڭگىلىك مۇراسى مەن ءپاتريوتيزمنىڭ وزگەرمەس نىشانىن دارىپتەۋ ماقساتىندا نومينالى 1 دوللار بولاتىن جاڭا التىن مونەتانى سوعا باستايدى. مونەتادا پرەزيدەنت ترامپتىڭ بەينەسى بەينەلەنگەن»، – دەدى ول.
مونەتانىڭ الدىڭعى بەتىندە دونالد ترامپتىڭ بەينەسى جانە «In God We Trust» ء(«بىز قۇدايعا سەنەمىز») دەگەن جازۋ بەينەلەنگەن. ونىڭ اينالاسىندا «Liberty» («بوستاندىق») جانە «1776–2026» دەگەن جازۋلار ورنالاستىرىلعان.
مونەتانىڭ ارتقى بەتىندە ءبىر قولىمەن جەبەلەردى، ەكىنشىسىمەن ءزايتۇن بۇتاعىن ۇستاپ تۇرعان قىران قۇس بەينەلەنگەن.
ترامپتىڭ ەكىنشى پرەزيدەنتتىك مەرزىمى باستالعالى بەرى ءوزى جانە ونىڭ وداقتاستارى پرەزيدەنتتىڭ اتى-ءجونى مەن پورترەتى بەينەلەنگەن فەدەرالدىق قۇجاتتار مەن تولەم قۇرالدارىنىڭ جاڭا نۇسقالارىن شىعارۋدى قولداپ كەلەدى. ولاردىڭ قاتارىندا ترامپتىڭ سۋرەتى سالىنعان مەرەيتويلىق پاسپورت جانە جاڭادان باسىلعان 100 دوللارلىق بانكنوتتارعا ونىڭ قولتاڭباسىن ەنگىزۋ باستامالارى بار.
سونداي-اق پرەزيدەنتتىڭ بەينەسىن 24 كاراتتىق التىن مونەتالارعا جانە نومينالى 250 دوللار بولاتىن مەرەيتويلىق بانكنوتتارعا ورنالاستىرۋ ۇسىنىستارى دا ايتىلعان.
وتكەن جىلى ترامپ اۋقاتتى شەتەل ازاماتتارىنا ارنالعان ءوز بەينەسى بار «التىن كارتانى» تانىستىرعان بولاتىن.
