ىستانبۇل. وسىدان 71 جىل بۇرىن التايدان كوشكەن ەلدىڭ ءبىر توبى ينديا، پاكىستان اسىپ، تۇركيادان پانا تاپتى. «ءتۇبىمىز تۇرىك» دەگەندەي تۇركيا ۇكىمەتى قانداستارىمىزعا ەرەكشە قامقورلىق جاساپ، باۋىرىنا باستى. كوشتىڭ العاشقى قازىعى كونيا، نيگدە وبلىستارىنا قاعىلسا، سوڭىنان ىستانبۇلعا، ونىڭ ىشىندە زەيتۇنبۇرىن جانە باعجىلار اۋدانىنا قونىس اۋداردى.
باعجىلار اۋدانىندا كوش باستاۋشىلارى دالەلحان قاجى، حاليفا التاي، قۇنانباي ءنازىر، مۇحاممەد قىلىش، توقتاۋباي توپىلى، ءمانسۇر ءتايجى ت.ب ۇلكەن بەلسەندىلىك كورسەتتى. 1 ميليونعا جۋىق حالىق تۇراتىن باعىجىلار اۋدانىنىڭ ورتالىعى كۇنەستى (Gunecli) دە «قازاقكەنتى» تۇرعىن ءۇي اۋىلى بوي كوتەردى. قازىر 1973 جىلى سالىنعان التاي مەشىتى، التاي قازاقتارى قوعامدىق ۇيىمى، احمەت ياسساۋي قايىرىمدىلىق قورى، وقۋ كۋرسى جۇمىس ىستەيدى. ايگىلى قازاق پالۋانى مۇستافا كابەنۇلى وزتۇرىكتىڭدە بالالىق، جاستىق شاعى وسى وڭىردە ءوتتى.
جىل باسىندا ورتالىق مادەنيەت ءۇيىنىڭ الدىندا قازاق – تۇرىك دوستىعىن بەينەلەيتىن قارا ءمارمار تاسپەن كومكەرىلگەن ەسكەرتكىش بەلگىسى اشىلدى. ال بۇگىن باعجىلار مادەنيەت سارايىندا دومبىرا كۋرسىنىڭ تۇساۋ كەسەر شاراسى بولدى. ىستانبۇلداعى قازاق باس كونسۋلدىعىنىڭ ۇيىمداستىرۋمەن وتكىزىلگەن شاراعا اۋدان اكىمشىلىگى قولداۋ كورسەتتى. اۋدان اكىمشىلىگىنىڭ ورىنباسارى ۆولكان (Volkan Cakimak), قازاق باس كونسۋلى ءنۇريددين امانقۇل قۇتتىقتاۋ ءسوز سويلەدى.
ءداستۇرلى ۇلتتىق ونەرىمىزدىڭ سيمۆولى دومبىرا كۋرسىن اشۋدى ماقسات ەتىپ، قازاقستاننان 80 دومبىراعا تاپسىرىس بەردىك. قازاق قانداستارىمىزدىڭ كوپ شوعىرلانعان ايماعىنا وسى 80 دومبىرانى قۇراستىرىپ، ورتامىزعا اكەلگەن، مادەني-دوستىق بايلانىستى دامىتۋعا ەرەكشە ۇلەس قوسقان كومپانيا باسشىلارىنا العىسىمدى بىلدىرەمىن. ولار بۇگىن ءبىزدىڭ ارامىزدا وتىر – دەدى باس كونسۋل.
«Borusan Cat» كومپانياسىنىڭ باسشىسى ادىنان كەسكىن (Adinan Keskin), «Ozge Epic» قور جەتەكشىسى ماقپال جۇماباي، «KazDER» قازاقكەنت التاي قوعامىنىڭ باسشىسى ەركان يلدىز وي ءبولىسىتى. 80 دومبىرا مەن قوسا قازاقتىڭ ويۋ-ورنەكتى شاپاندارىنىڭ بىرنەشە داناسىن اكەلگەن ماقپال جۇماباي جانە باس كونسۋل قوناقتاردىڭ يىعىنا شاپان جاپتى.
اباي ەسكەرتكىشى، اباي الاڭى ورنالاسقان زەيتۇنبۇرىن اۋدانىنداعى اباي اتىنداعى قىزدار مەكتەپ ليتسەيىن دە دە بىرنەشە كۇن بۇرىن دومبىرا كۋرسىن اشۋ ءراسىمى بولعان ەدى. ىستانبۇلداعى قازاق باس كونسۋلدىعى ۇيىمداستىرعان شاراعا اۋدان اكىمى ادەم ۋسلۋ (Adem Uslu) قاتىستى. مەكتەپ ديرەكتورى ەنەس داعلى مىرزاعا 40 دومبىرا تاپسىرىلدى.
ەكى اۋداندا وتكىزىلگەن شارالاردى دۇنيەجۇزى قازاقتارى قاۋىمداستىعىنىڭ وكىلى، ىستانبۇلداعى قازاقستان مادەنيەت جانە ساۋدا ورتالىعىنىڭ باسشىسى ەرجان ءۋايىس جۇرگىزدى.
جيىنعا قانداستاردىڭ كورنەكتى وكىلى فازىل توپلى، اق پارتيانىڭ القا مۇشەسى راشيدا يۋكسەل قازاقستان تەلەارناسىنىڭ ءتىلشىسى ايدوس ءاشىم، شاڭىراقتىڭ باسشىسى دانيار يمانباق قاتىسىپ، 90 جاستاعى باتاگوي اقساقال ابدۋراحمەن چەتين باتا بەردى. قازىر تۇركيانىڭ باسقا ايماقتارىنان دا قازاق دومبىراسىنا دەگەن سۇرانىستار ءتۇسىپ جاتىر. بۇل ءبىزدىڭ قازاق حالقىنا ونىڭ ونەرى مەن دومبىراسىنا ۇلكەن قۇرمەت.
ەرجان ءۋايىس
قازاقستاننىڭ ەڭبەك سىڭىرگەن قايراتكەرى
