Ystanbul. Osydan 71 jyl buryn Altaıdan kóshken eldiń bir toby Indııa, Pakistan asyp, Túrkııadan pana tapty. «Túbimiz Túrik» degendeı Túrkııa úkimeti qandastarymyzǵa erekshe qamqorlyq jasap, baýyryna basty. Kóshtiń alǵashqy qazyǵy Konııa, Nıgde oblystaryna qaǵylsa, sońynan Ystanbulǵa, onyń ishinde Zeıtunburyn jáne Baǵjylar aýdanyna qonys aýdardy.
Baǵjylar aýdanynda kósh bastaýshylary Dálelhan qajy, Halıfa Altaı, Qunanbaı Názir, Muhammed Qylysh, Toqtaýbaı Topyly, Mánsúr Táıji t.b úlken belsendilik kórsetti. 1 mılıonǵa jýyq halyq turatyn Baǵyjylar aýdanynyń ortalyǵy Kúnesti (Gunecli) de «Qazaqkenti» turǵyn úı aýyly boı kóterdi. Qazir 1973 jyly salynǵan Altaı meshiti, Altaı qazaqtary qoǵamdyq uıymy, Ahmet Iassaýı qaıyrymdylyq qory, oqý kýrsy jumys isteıdi. Áıgili Qazaq palýany Mustafa Kábenuly Óztúriktińde balalyq, jastyq shaǵy osy óńirde ótti.
Jyl basynda ortalyq mádenıet úıiniń aldynda Qazaq – Túrik dostyǵyn beıneleıtin qara mármar taspen kómkerilgen eskertkish belgisi ashyldy. Al búgin Baǵjylar mádenıet saraıynda dombyra kýrsynyń tusaý keser sharasy boldy. Ystanbuldaǵy Qazaq Bas konsýldyǵynyń uıymdastyrýmen ótkizilgen sharaǵa aýdan ákimshiligi qoldaý kórsetti. Aýdan ákimshiliginiń orynbasary Volkan (Volkan Cakimak), Qazaq Bas konsýly Núrıddın Amanqul quttyqtaý sóz sóıledi.
Dástúrli ulttyq ónerimizdiń sımvoly dombyra kýrsyn ashýdy maqsat etip, Qazaqstannan 80 dombyraǵa tapsyrys berdik. Qazaq qandastarymyzdyń kóp shoǵyrlanǵan aımaǵyna osy 80 dombyrany qurastyryp, ortamyzǵa ákelgen, mádenı-dostyq baılanysty damytýǵa erekshe úles qosqan kompanııa basshylaryna alǵysymdy bildiremin. Olar búgin bizdiń aramyzda otyr – dedi Bas konsýl.
«Borusan Cat» kompanııasynyń basshysy Adynan Keskin (Adinan Keskin), «Ozge Epic» Qor jetekshisi Maqpal Jumabaı, «KazDER» Qazaqkent Altaı qoǵamynyń basshysy Erkan Ildyz oı bólisiti. 80 dombyra men qosa Qazaqtyń oıý-órnekti shapandarynyń birneshe danasyn ákelgen Maqpal Jumabaı jáne Bas konsýl qonaqtardyń ıyǵyna shapan japty.
Abaı eskertkishi, Abaı alańy ornalasqan Zeıtunburyn aýdanyndaǵy Abaı atyndaǵy qyzdar mektep lıeıin de de birneshe kún buryn dombyra kýrsyn ashý rásimi bolǵan edi. Ystanbuldaǵy Qazaq Bas konsýldyǵy uıymdastyrǵan sharaǵa aýdan ákimi Adem Ýslý (Adem Uslu) qatysty. Mektep dırektory Enes Daǵly myrzaǵa 40 dombyra tapsyryldy.
Eki aýdanda ótkizilgen sharalardy Dúnıejúzi Qazaqtary qaýymdastyǵynyń ókili, Ystanbuldaǵy Qazaqstan mádenıet jáne saýda ortalyǵynyń basshysy Erjan Ýáıis júrgizdi.
Jıynǵa qandastardyń kórnekti ókili Fazyl Toply, AQ partııanyń alqa múshesi Rashıda Iýksel Qazaqstan telearnasynyń tilshisi Aıdos Áshim, Shańyraqtyń basshysy Danııar Imanbaq qatysyp, 90 jastaǵy batagóı aqsaqal Abdýrahmen Chetın bata berdi. Qazir Túrkııanyń basqa aımaqtarynan da Qazaq dombyrasyna degen suranystar túsip jatyr. Bul bizdiń Qazaq halqyna onyń óneri men dombyrasyna úlken qurmet.
Erjan Ýáıis
Qazaqstannyń eńbek sińirgen qaıratkeri
