كورىسۋ كۇنىندەگى كوڭىل كۇي

14 ناۋرىز كۇنى كورىسۋ مەرەكەسىنە وراي ورال قالاسىنداعى اتامەكەن ونەر ورداسى ساحناسىندا «ناۋرىز-دۋمان» اتتى مەرەكەلىك كونتسەرت ءوتتى.

تاعىلىمى مول مادەني شاراعا باتىس قازاقستان وبلىسىنىڭ اكىمى ناريمان تورەعاليەۆ قاتىسىپ، ءوڭىر تۇرعىندارىن امال مەرەكەسىمەن قۇتتىقتادى.

كەش شىمىلدىعى ەرەكشە قويىلىممەن اشىلدى. ساحنادا قىس مەزگىلىن بەينەلەيتىن حورەوگرافيالىق كومپوزيتسيا كورسەتىلىپ، 3D ەففەكتىلەر مەن وركەستر سۇيەمەلى ارقىلى تابيعاتتىڭ جاڭارۋى كوركەم سۋرەتتەلدى. قىستىڭ ىزعارى مەن كوكتەمنىڭ جىلۋى كورىنىس تاپقان قويىلىم كورەرمەندى مەرەكەلىك كوڭىل كۇيگە بولەدى. كەيىن ساحناعا شىققان ونەرپازدار ۇلكەن-كىشى بولىپ كورىسىپ، امال مەرەكەسىنىڭ ءمانىن ايشىقتادى.

كونتسەرت بارىسىندا جىر-تەرمە، حالىق اندەرى، كۇيلەر مەن بيلەر ورىندالىپ، ۇلتتىق ونەردىڭ سان قىرى كورەرمەنگە ۇسىنىلدى. العاشقى بولىپ تەرمە ورىنداعان كەڭەسارى بولعانباەۆ كورىسۋ مەن ناۋرىزدىڭ ماڭىزىن جىرعا قوستى. سكريپكاشىلار ءانسامبلى ەۆگەني برۋسيلوۆسكيدىڭ «شاشۋ» شىعارماسىن ورىنداپ، «اتامەكەن» حالىق ءبيى ءانسامبلى «نۇر گۇلى» ءبيىن ۇسىندى.

ساحنا تورىندە قازاقتىڭ ءداستۇرلى ءان ونەرى دە كەڭىنەن ناسيحاتتالدى. عاريفوللا قۇرمانعاليەۆتىڭ «سالەم، قازاقستان» ءانىن «قۇرمەت» وردەنىنىڭ يەگەرى، قر مادەنيەت سالاسىنىڭ ۇزدىگى قايرات كاكىموۆ ورىنداپ، ءداستۇرلى انشىلەر شەرۋى كورەرمەننىڭ ىستىق ىقىلاسىنا بولەندى. سونداي-اق كونتسەرتتە «دۋدار-اي»، «گاۋھار تاس»، «اقباقاي»، «اقسيسا»، «يليگاي»، «گۇلدەرايىم» سىندى حالىق اندەرى ورىندالدى.

كۇي ونەرى دە نازاردان تىس قالمادى. قۇرمانعازى مەن دينانىڭ كۇيلەرىنەن قۇرالعان كۇي تارتىسىندا اسلان عۇماروۆ، تۇرلىحان ابۋحانوۆ جانە ادىلەت جولدىعالي ونەر كورسەتىپ، قوس ىشەكتەن كۇي توگىلدى.

كەش بارىسىندا وبلىس اكىمى ناريمان تورەعاليەۆ جينالعان جۇرتشىلىقتى كورىسۋ كۇنىمەن قۇتتىقتاپ، بۇل مەرەكەنىڭ حالىق بىرلىگى مەن تاتۋلىعىن نىعايتاتىن تاعىلىمدى كۇن ەكەنىن اتاپ ءوتتى.

— الەم ءارى-ءسارى كۇي كەشكەن قازىرگى كەزەڭدە بىزگە بىرلىك پەن تاتۋلىقتىڭ قانشالىقتى قۇندى ەكەنىن تەرەڭ ءتۇسىنىپ وتىرمىز. ءوڭىرىمىزدىڭ الەۋمەتتىك-ەكونوميكالىق كورسەتكىشتەرى، ءتۇرلى سالالارداعى وڭ وزگەرىستەر – تۇعىرلى تاۋەلسىزدىكتىڭ جەمىسى. ەندەشە وسى قۇندىلىقتى كوزدىڭ قاراشىعىنداي قورعاپ، مەملەكەت مۇددەسى مەن حالىق يگىلىگى جولىندا جۇدىرىقتاي جۇمىلىپ ەڭبەك ەتۋ – بارشامىزعا ورتاق جاۋاپكەرشىلىك. كورىسۋ كۇنىندەگى كوپ تاعىلىمنىڭ ءبىرى دە وسى، – دەدى ءوڭىر باسشىسى.

مەرەكەلىك كەشتىڭ فينالىندا ونەرپازدار نۇرعيسا تىلەنديەۆتىڭ ءوز ەلىم ءانىن بىرگە ورىنداپ، كورەرمەنگە ەرەكشە اسەر سىيلادى. ۇلتتىق ونەر مەن ءداستۇردى دارىپتەگەن مازمۇندى شارا اق باتامەن تۇيىندەلدى.