ۇلىتاۋ وبلىسىندا رەسپۋبليكالىق رەفەرەندۋم اياسىندا 127 ۋچاسكەلىك رەفەرەندۋم كوميسسياسى ءوز جۇمىسىن باستادى. جالپى وڭىردە رەفەرەندۋمدى وتكىزۋ ءۇشىن 6 اۋماقتىق جانە 127 ۋچاسكەلىك كوميسسيا قىزمەت اتقارۋدا. كوميسسيالاردىڭ قۇرامىندا بارلىعى 845 ادام بار، ونىڭ ىشىندە 42-ءسى اۋماقتىق، 803-ءى ۋچاسكەلىك كوميسسيا مۇشەلەرى.
ۇلىتاۋ وبلىسى بويىنشا داۋىس بەرۋ تىزىمىنە 136 447 ازامات ەنگىزىلگەن.
رەفەرەندۋم ۋچاسكەلەرىندە داۋىس بەرۋ ساعات 07:00-دەن 20:00-گە دەيىن جۇرگىزىلەدى. ال جايرەم كەنتىندەگى 6 ۋچاسكەدە تاۋ-كەن بايىتۋ كومبيناتى قىزمەتكەرلەرىنىڭ اۋىسىمدىق جۇمىس كەستەسىنە بايلانىستى داۋىس بەرۋ ۋاقىتى 06:00-دەن 20:00-گە دەيىن بەلگىلەنگەن.
سايلاۋشىلارعا قولايلى جاعداي جاساۋ ماقساتىندا وبلىس قالالارىنداعى 57 ۋچاسكەدە ازاماتتاردى سايلاۋشىلار تىزىمىنەن تەكسەرۋگە ارنالعان ونلاين-سەرۆيستەر، ال 6 ۋچاسكەدە ازاماتتاردى تىركەۋ سەرۆيستەرى ورناتىلعان.
سونىمەن قاتار رەفەرەندۋم كەزىندە مۇگەدەكتىگى بار ازاماتتاردىڭ داۋىس بەرۋىنە بارلىق قاجەتتى جاعداي جاسالعان. بارلىق ۋچاسكەلەر پاندۋستارمەن جانە ارنايى تۇتقالارمەن جابدىقتالعان. كرەسلو-اربا پايدالاناتىن ازاماتتارعا ۆولونتەرلار كومەگى كورسەتىلەدى، سونداي-اق وبلىس بويىنشا 7 ينۆاتاكسي قىزمەتى جۇمىس ىستەيدى.
