13 ناۋرىزدا قاراعاندى قالاسىندا قاراعاندى وبلىسىنىڭ 90 جىلدىعىنا ارنالعان مەرەيتويلىق ءىس-شارالار اياسىندا قاراعاندى وبلىستىق تاريحي-ولكەتانۋ مۋزەيىنىڭ جاڭارتىلعان ەكسپوزيتسياسىنىڭ سالتاناتتى اشىلۋى ءوتتى. ءىس-شاراعا قاراعاندى وبلىسى اكىمدىگى اپپاراتىنىڭ وكىلدەرى، وبلىستىق باسقارما باسشىلارى، قازاقستان رەسپۋبليكاسى مادەنيەت جانە اقپارات مينيسترلىگى مادەنيەت كوميتەتىنىڭ وكىلدەرى، ۇلتتىق مۋزەي مەن وڭىرلىك مۋزەيلەردىڭ باسشىلارى، ە.ا. بوكەتوۆ اتىنداعى قاراعاندى ۋنيۆەرسيتەتىنىڭ عالىمدارى، قوعام قايراتكەرلەرى جانە بۇقارالىق اقپارات قۇرالدارىنىڭ وكىلدەرى قاتىستى.
جاڭارتىلعان ەكسپوزيتسيا ءوڭىردىڭ باي تاريحي-مادەني مۇراسىن تانىستىرۋدى، ۇرپاقتار ساباقتاستىعىن نىعايتۋدى جانە سارىارقا دالاسىنىڭ الەمدىك وركەنيەت تاريحىنداعى ورنىن كەڭىنەن ناسيحاتتاۋدى ماقسات ەتەدى. سونىمەن قاتار مۋزەي ەكسپوزيتسياسى قاراعاندى وبلىسىنىڭ كونە داۋىردەن باستاپ يندۋستريالىق قالىپتاسۋى مەن تاۋەلسىز قازاقستان كەزەڭىندەگى دامۋ جولىن كورسەتىپ، ۇلتتىق تاريحي سانانى دامىتۋعا باعىتتالعان.
مۋزەيدىڭ رەەكسپوزيتسياسى 2025–2026 جىلدارى جۇزەگە اسىرىلىپ، سوڭعى 13 جىل ىشىندەگى ەڭ اۋقىمدى جاڭعىرتۋ جوبالارىنىڭ ءبىرى بولدى. جوبانىڭ باستى ماقساتى – ءوڭىر تاريحىن قازىرگى ۇرپاققا جاڭا عىلىمي كوزقاراس تۇرعىسىنان تانىستىرىپ، ونى زاماناۋي تەحنولوگيالاردىڭ كومەگىمەن كورنەكى ءارى مازمۇندى تۇردە جەتكىزۋ.
جاڭارتىلعان مۋزەي كەڭىستىگىندە تاقىرىپتىق ينستاللياتسيالار، ينتەراكتيۆتى ايماقتار، مۋلتيمەديالىق كيوسكىلەر، گولوگراممالار جانە پروەكتسيالىق جۇيەلەر ورناتىلعان. كەلۋشىلەر سەنسورلىق ەكراندار ارقىلى ارحيۆتىك قۇجاتتارمەن تانىسىپ، سيرەك كەزدەسەتىن ەكسپوناتتار تۋرالى كەڭەيتىلگەن اقپارات الا الادى. مۇنداي تەحنولوگيالىق شەشىمدەر مۋزەي ەكسپوزيتسياسىن تەك اقپاراتتىق عانا ەمەس، سونىمەن قاتار تانىمدىق ءارى تارتىمدى مادەني الاڭعا اينالدىرادى.
ەكسپوزيتسيا جالپى سانى 13 زالدان تۇرادى. وندا ءوڭىر تاريحى كوشپەلى يمپەريالار داۋىرىنەن باستاپ قازاقستان رەسپۋبليكاسىنىڭ تاۋەلسىزدىك كەزەڭىنە دەيىنگى تاريحي كەزەڭدەردى قامتيدى. كورمەدە ارحەولوگيالىق ولجالار، قولا جانە ەرتە تەمىر داۋىرىنە جاتاتىن جادىگەرلەر، قازاق حالقىنىڭ ماتەريالدىق مادەنيەتى، سونداي-اق قاراعاندى قالاسى مەن قاراعاندى وبلىسىنىڭ قالىپتاسۋ تاريحىنا قاتىستى قۇندى دەرەكتەر ۇسىنىلعان.
جاڭارتىلعان مۋزەي ەكسپوزيتسياسى ءوڭىر تۇرعىندارى مەن قالا قوناقتارى ءۇشىن ماڭىزدى مادەني-تانىمدىق ورتالىققا اينالىپ، قاراعاندى وبلىسىنىڭ تۋريستىك الەۋەتىن دامىتۋعا دا ۇلەس قوسپاق. بولاشاقتا مۋزەي ءوڭىردىڭ نەگىزگى تۋريستىك مارشرۋتتارىنىڭ ءبىرى رەتىندە ۇسىنىلادى.
قاراعاندى وبلىستىق تاريحي-ولكەتانۋ مۋزەيى — ايماقتاعى ەڭ كونە مادەني ورتالىقتاردىڭ ءبىرى. ونىڭ جاڭارتىلعان ەكسپوزيتسياسى ءوڭىردىڭ باي تاريحىن جاڭا فورماتتا تانىستىرىپ، كەلۋشىلەرگە وتكەن مەن بۇگىندى بايلانىستىراتىن ەرەكشە تانىمدىق كەڭىستىك ۇسىنادى.
**مەكەنجاي:** قاراعاندى قالاسى، ەرۋباەۆ كوشەسى، 38
**قاراعاندى وبلىستىق تاريحي-ولكەتانۋ مۋزەيى**.
