مارات سۇلتانعازيەۆ رەسپۋبليكالىق رەفەرەندۋم اياسىندا داۋىس بەردى. ءوڭىر باسشىسى قوناەۆ قالاسىنداعى №949 رەفەرەندۋم ۋچاسكەسىنە بارىپ، ءوز تاڭداۋىن جاسادى. ايماق باسشىسى بۇل كۇننىڭ ەل ءۇشىن ماڭىزى ەرەكشە ەكەنىن اتاپ ءوتتى.
«بۇگىن ەلىمىز ءۇشىن اسا ماڭىزدى تاريحي ءسات. ءوزىم تىركەلگەن رەفەرەندۋم ۋچاسكەسىنە بارىپ، الماتى وبلىسى تۇرعىنى ءارى وسى ەلدىڭ ازاماتى رەتىندە تاڭداۋىمدى جاسادىم. ءار ازاماتتىڭ تاڭداۋى مەملەكەتىمىزدىڭ تۇراقتىلىعى مەن دامۋىنا نەگىز بولادى»، – دەگەن مارات ەلەۋسىزۇلى الماتى وبلىسىندا بۇل ناۋقاندى ۇيىمداستىرۋ ءۇشىن اۋقىمدى جۇمىستار اتقارىلعانىن باياندادى.
«وڭىردە جالپى سانى 677 رەفەرەندۋم ۋچاسكەسى اشىلدى. ونىڭ ىشىندە اۋرۋحانالار، اسكەري بولىمدەر مەن الەۋمەتتىك ورىنداردا 36 ۋچاسكە جۇمىس ىستەپ تۇر. داۋىس بەرۋ پروتسەسىن جۇرگىزۋگە تارتىلعان 4781 ماماننىڭ بارلىعى ارنايى وقۋدان ءوتىپ، دايىندىقتارىن پىسىقتادى. سونداي-اق 16 قوعامدىق ۇيىم وكىلى باقىلاۋ جۇرگىزۋدە.
تۇرعىندارعا ىڭعايلى بولۋى ءۇشىن تسيفرلىق مۇمكىندىكتەر دە قاراستىرىلعان. ۋچاسكەلەردىڭ باسىم بولىگى ازاماتتاردى تەكسەرۋ جۇيەسىنە قوسىلعان. قوناەۆ، ەسىك، تالعار، قاسكەلەڭ قالالارى مەن وتەگەن باتىر كەنتىندەگى 5 ۋچاسكەدە تۇرعىنداردى تىكەلەي سول جەردە تىزىمگە قوسۋ مۇمكىندىگى بار. وبلىس بويىنشا رەفەرەندۋمعا قاتىسۋ قۇقىعى بار 1 ميلليوننان استام ازامات تىزىمگە ەنىپ، ولاردىڭ بارلىعىنا شاقىرتۋلار تاراتىلدى. مۇمكىندىگى شەكتەۋلى جانداردىڭ كەدەرگىسىز داۋىس بەرۋىنە ەرەكشە كوڭىل ءبولىندى. وبلىستاعى 2320 مۇگەدەكتىگى بار ازامات ءۇشىن ۋچاسكەلەردە ارنايى پاندۋستار، ىڭعايلى كابينالار مەن كورۋ، ەستۋ قابىلەتى ناشار جاندارعا ارنالعان كومەكشى قۇرالدار مەن بەلگىلەر ورناتىلدى»، – دەگەن وبلىس اكىمى وزگەرىس جاۋاپكەرشىلىكتەن باستالاتىنىن، جاڭارتىلعان كونستيتۋتسيا ارقايسىمىزدىڭ قۇقىعىمىزدى نىعايتىپ، مەملەكەتتىڭ حالىق الدىنداعى مىندەتىن ايقىنداي تۇسەتىنىن جەتكىزدى.
ايتا كەتەيىك، بۇگىن قازاقستان بويىنشا جاڭا كونستيتۋتسيا جوباسىنا قاتىستى رەسپۋبليكالىق رەفەرەندۋم ءوتىپ جاتىر. كامەلەت جاسىنا تولعان ءاربىر ازامات ءوز تاڭداۋىن جاساۋعا قۇقىلى.
