فوتو: 24KZ
ماسكەۋدە قازاق حالقىنىڭ كورنەكتى قوعام جانە مەملەكەت قايراتكەرى، "الاش" قوزعالىسىنىڭ نەگىزىن قالاۋشى ءارى جەتەكشىسى، "الاشوردا" ۇكىمەتىنىڭ توراعاسى ءاليحان بوكەيحانعا بيۋست ورناتىلدى، دەپ حابارلايدى "ادىرنا" ۇلتتىق پورتالى 24.kz ارناسىنا سىلتەپ.
اقپاراتقا سايكەس، ماسكەۋدەگى بيۋست ۇلت كوسەمىنىڭ بيىل تۋعانىنا 160 جىل تولۋىنا وراي اشىلعان.
بيۋست "حالىق شارۋاشىلىعى جەتىستىكتەرى كورمەسى" كەشەنىندە بوي كوتەرگەن. قولا ءمۇسىننىڭ سالماعى 80 كەلىدەن اسادى. جارتى جىل بۇرىن قازاقستاندا ارنايى ازىرلەنگەن.
"مۇسىندەگى بەينەنىڭ ءاليحان بوكەيحاننىڭ سۋرەتىنە قاتتى ۇقساعانىن قالادىق. ءمۇسىنشىنى تاڭداپ الىپ، تاپسىرىس بەردىك. بەينەسىن جانە باسقا دا بارلىق ماسەلەنى ەلشىلىكپەن كەلىسە وتىرىپ، اتقاردىق", - دەيدى كاسىپكەر جانبولات نادىر.
قازاقستاننىڭ رەسەيدەگى توتەنشە جانە وكىلەتتى ەلشىسى داۋرەن اباەۆ رەسەيدە ءاليحان بوكەيحانعا ارناۋلى ءمۇسىننىڭ قويىلۋى – ونىڭ ەل تاريحىنداعى ولشەۋسىز ۇلەسىنە دەگەن تەرەڭ قۇرمەتتىڭ بەلگىسى ەكەنىن اتاپ ءوتتى.
"ول رەسەيدىڭ مەملەكەتتىك دۋماسىندا قىزمەت ەتىپ، بايىرعى حالىقتاردىڭ قۇقىعىن قورعادى. ول حالىقتار بىرلىگىنە جانە وركەندەپ، دامۋعا سەندى. ونىڭ مۇراسى ەلدەرىمىز اراسىنداعى ستراتەگيالىق ارىپتەستىك قاعيدالارىندا ساقتالعان", - دەدى داۋرەن اباەۆ.
ايتا كەتسەك، ءاليحان بوكەيحان ءومىرىنىڭ سوڭعى 15 جىلىن ماسكەۋدە وتكىزگەن. مىرزاقاماقتا وتىرىپ، عىلىم، ادەبيەتپەن اينالىسقان.
