يران رەسەيدەن ەڭ جاڭا «گەران-4» جانە «گەران-5» سوققى بەرەتىن ۇشقىشسىز ۇشۋ اپپاراتتارىن سۇراتتى. بۇل تۋرالى Financial Times جازدى، دەپ حابارلايدى «ادىرنا» ءتىلشىسى.
«تەگەران ماسكەۋگە زاماناۋي ۇشقىشسىز اپپاراتتاردى بەرۋ تۋرالى ءوتىنىش جاساعان»،– دەلىنگەن حابارلامادا.
شەتەلدىك جۋرناليستەردىڭ مالىمەتىنشە، سوڭعى ۋاقىتتا رەسەيلىك درونداردىڭ مۇمكىندىكتەرى ايتارلىقتاي ارتقان.
Financial Times باسىلىمىنىڭ جازۋىنشا، درونداردى ورتالىقتاندىرىلعان تۇردە ءوندىرۋ كرەملگە ولاردى جەتىلدىرۋگە، ۇرىس قيمىلدارىنان الىنعان تاجىريبەنى ەسكەرۋگە جانە جاڭا ۇلگىلەردى جەدەل ەنگىزۋگە مۇمكىندىك بەرەدى.
ايتا كەتەيىك، رەاكتيۆتى قوزعالتقىشپەن جابدىقتالعان «گەران-5» درونى ساعاتىنا 600 شاقىرىم جىلدامدىققا دەيىن جەتىپ، 1000 شاقىرىمعا دەيىن ۇشا الادى. ونىڭ جاۋىنگەرلىك بولىگى 90 كەلى جۇك كوتەرۋگە قاۋقارلى. سونداي-اق درون جاساندى ينتەللەكت ەلەمەنتتەرى بار باعىتتاۋ جۇيەسىمەن جانە راديوەلەكتروندىق كۇرەس قۇرالدارىنىڭ اسەرىنە ءتوزىمدى انتەننالارمەن جابدىقتالعان.
ساراپشىلاردىڭ باعالاۋىنشا، رەسەيدە «گەران-5» دروندارىن ءوندىرۋ الەۋەتى ايىنا شامامەن 5 مىڭ داناعا جەتەدى.
«ۆوەننايا حرونيكا» ساراپشىلارىنىڭ مالىمەتىنشە، رەسەيدىڭ «الابۇعا» ارنايى ەكونوميكالىق ايماعىنداعى «گەران-5» ءوندىرىس زاۋىتى كەڭەيتىلۋىن جالعاستىرىپ جاتىر. وندا جاڭا قۇراستىرۋ تسەحتارى مەن قويما عيماراتتارىنىڭ سالىنىپ جاتقانى بايقالعان.
