14 ناۋرىزدا قىرعىز رەسپۋبليكاسىنىڭ جوعارى كەڭەسىنىڭ (جوگوركۋ كەڭەشى) دەپۋتاتى ءارى بۇرىنعى قىرعىزستان ۇلتتىق قاۋىپسىزدىك مەملەكەتتىك كوميتەتى (ۇقمك) توراعاسى قامشىبەك تاشيەۆتىڭ ءىنىسى شايربەك تاشيەۆ ءوز ەركىمەن دەپۋتاتتىق مانداتىنان باس تارتتى.
قىرعىزستاننىڭ ورتالىق سايلاۋ كوميسسياسى ونىڭ جەكە ءوتىنىشى نەگىزىندە دەپۋتاتتىق وكىلەتتىگىن مەرزىمىنەن بۇرىن توقتاتتى. كوميسسيانىڭ رەسمي سايتىندا جاريالانعان اقپاراتقا سايكەس، وسىدان كەيىن دەپۋتاتتىق كۋالىگى جارامسىز دەپ تانىلعان.
شايربەك تاشيەۆ سايلاۋشىلارعا جولداعان ۇندەۋىندە بۇل شەشىمنىڭ وعان وڭاي تيمەگەنىن ايتتى. ونىڭ سوزىنشە، ول مەملەكەت مۇددەسى مەن حالىق سەنىمىن باسشىلىققا الىپ، ەلدەگى ساياسي تۇراقتىلىق پەن قوعامداعى تىنىشتىق ءۇشىن وسىنداي قادام جاساۋعا ءماجبۇر بولعان. سونىمەن قاتار سوڭعى ۋاقىتتا الەۋمەتتىك جەلىلەردە ءوزى مەن وتباسى تۋرالى جالعان اقپاراتتار مەن جالا كەڭىنەن تارالىپ، جاقىندارىنىڭ تىنىشتىعىنا اسەر ەتكەنىن اتاپ ءوتتى.
وقيعالار الدىندا، 13 ناۋرىز كۇنى شايربەك تاشيەۆ قىرعىزستان ىشكى ىستەر مينيسترلىگىنىڭ باس تەرگەۋ باسقارماسىنا جاۋاپ بەرۋگە شاقىرىلعان. الايدا ونىڭ قانداي ءىس بويىنشا شاقىرىلعانى رەسمي تۇردە جاريالانعان جوق.
بۇل جاعداي ينتەرنەتتە بىرنەشە كومپرومات ماتەريالداردىڭ تارالۋىمەن قاتار ءجۇردى. الەۋمەتتىك جەلىلەردە ونىڭ كازينودا 1,32 ميلليون دوللاردان استام قارجى ۇتىلعانى تۋرالى ۆيدەو تارادى. كەيبىر دەرەكتەردە قارىزدىڭ ءبىر بولىگىن قىلمىس الەمىندە بەدەلدى تۇلعا سانالاتىن كامچى كولباەۆ وتەگەنى ايتىلعان. بۇدان بولەك، مۇناي بازاسىن ساتىپ الۋ، Pepsi زاۋىتىن سالۋ جوباسى جانە جۇبايىنا قىمبات سىيلىقتار بەرۋ تۋرالى اقپاراتتار دا جاريالانعان.
ايتا كەتۋ كەرەك، اقپان ايىندا قامشىبەك تاشيەۆ ۇقمك توراعاسى قىزمەتىنەن كەتكەننەن كەيىن شايربەك تاشيەۆ مانداتىنان باس تارتپايتىنىن ايتىپ، «قورقاقتاردىڭ قاتارىنان ەمەسپىن» دەپ مالىمدەگەن بولاتىن.
قىرعىزستانداعى بۇقارالىق اقپارات قۇرالدارى مەن الەۋمەتتىك جەلىلەردە بۇل وقيعاعا قاتىستى پىكىرلەر ەكىگە ءبولىندى. كەيبىر قولدانۋشىلار دەپۋتات مانداتىن تاپسىرۋ كومپرومات ۆيدەولار مەن تەرگەۋ قىسىمىنان كەيىن بولعانىن ايتىپ، مۇنى تاشيەۆتىڭ اينالاسىنداعى ادامداردى «تازالاۋ» دەپ باعالادى. ال باسقالارى بۇل شەشىمدى قولداپ، وسىنداي كولەمدەگى ايىپتاۋلاردان كەيىن ونىڭ قىزمەتتەن كەتكەنى دۇرىس بولعانىن ايتادى.
