اباي كىتاپحاناسىندا ۇلى ويشىل، اقىن شاكارىم قۇدايبەردىۇلى شىعارماشىلىعىن جاس ۇرپاق اراسىندا ناسيحاتتاۋعا ارنالعان IV رەسپۋبليكالىق «شاكارىم وقۋلارى» بايقاۋىنىڭ وبلىستىق ىرىكتەۋ كەزەڭى ءوتتى.
بايقاۋدىڭ نەگىزگى ماقساتى- جاس ۇرپاقتىڭ بويىنا شاكارىم قۇدايبەردىۇلىنىڭ شىعارمالارىنداعى ەستەتيكالىق تالعامدى، تۇلعالىق قاسيەتتەر مەن ادامي قۇندىلىقتاردى ءسىڭىرۋ ارقىلى ۇلتتىق رۋحاني مۇراعا دەگەن سۇيىسپەنشىلىكتى ارتتىرۋ، سونداي-اق قازاق ادەبيەتىنىڭ باي قازىناسىن دارىپتەۋ. «شاكارىم وقۋلارى» بايقاۋى قازاقستان رەسپۋبليكاسىنىڭ ۇلتتىق اكادەميالىق كىتاپحاناسى باستاماسىمەن جۇزەگە اسۋدا.
بايقاۋعا اباي وبلىسىنىڭ اۋداندارى مەن سەمەي قالاسىنداعى مەكتەپتەردىڭ 5–8 سىنىپ وقۋشىلارى اراسىنان ىرىكتەلگەن 16 وقۋشى، اتاپ ايتقاندا، اياكوز، اقسۋات، جاڭا سەمەي، بورودۋليحا، جارما، كوكپەكتى، ماقانشى، ۇرجار اۋداندارىنان قاتىستى.
قاتىسۋشىلار ونەرىن سارالاپ، رەسپۋبليكالىق كەزەڭگە جىبەرۋ ءۇشىن ارنايى ادىلقازىلار جاساقتالدى. ادىلقازىلار قۇرامىندا شاكارىمتانۋشى، قازاقستاننىڭ ەڭبەك سىڭىرگەن قايراتكەرى شاڭباي تۇردىقۇل قاسەنۇلى، اباي مۇراجايى ديرەكتورىنىڭ ورىنباسارى مەيرامگۇل سەيىتجاپارقىزى قايرانباەۆا جانە كىتاپحانا قىزمەتكەرى، اقىن باۋىرجان يگىلىك بولدى.
قاتىسۋشىلار اقىننىڭ ولەڭدەرىن جاتقا ءارى مانەرلەپ وقىپ، ساحنا مادەنيەتى مەن ۇلتتىق كيىم ۇلگىسى تالاپتارىنا ساي ونەر كورسەتتى.
I ورىندى اياگوز اۋدانى، وسپانقۇل مەڭاياقۇلى اتىنداعى ورتا مەكتەپتىڭ 5 سىنىپ وقۋشىسى سقاق ارۋجان ، II ورىندى سەمەي قالاسى، № 22 جالپى ورتا ءبىلىم بەرەتىن مەكتەپ ليتسەيىنىڭ 5 سىنىپ وقۋشىسى قاناتوۆا ەركە، III ورىندى اباي اۋدانى، اباي اتىنداعى مامانداندىرىلعان مەكتەپ-گيمنازيا ينتەرناتىنىڭ 6 سىنىپ وقۋشىسى الىبەك مەيىرجان قانجىعاسىنا بايلادى. ال، ىنتالاندىرۋ سىيلىعىن سەمەي قالاسى، № 3 ارنايى مەكتەپ-ينتەرناتىنىڭ 8 سىنىپ وقۋشىسى تىلەكقىزى كاۋسار يەلەندى.
جۇلدەلى ورىن الۋشىلاردى جەڭىستەرىمەن قۇتتىقتاي وتىرىپ، «بايريم» فاسفۋد ورتالىعى، «اباي مەدياگرۋپ» جشس جانە «oformlenie_jasminestudio» باعالى سىيلىقتار سىيلاپ، بارلىق قاتىسۋشىلارعا سەرتيفيكاتتار بەرىلدى. دەمەۋشىلىك كورسەتكەن بارلىق ازاماتتارعا كىتاپحانا اتىنان زور العىس بىلدىرەمىز!
ۇزدىك جەڭىمپاز رەتىندە تانىلعان سقاق ارۋجان رەسپۋبليكالىق كەزەڭگە جولداما الدى.
ريما قاناپياقىزى،
اباي اتىنداعى وبلىستىق كىتاپحاناسىنىڭ
دامىتۋ ءبولىمىنىڭ باسشىسى
