پرەزيدەنت قاسىم-جومارت توقاەۆ بارشا قازاقستاندىقتاردى ۇلىستىڭ ۇلى كۇنى – ءاز-ناۋرىز مەرەكەسىمەن شىن جۇرەكتەن قۇتتىقتادى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ ايتۋىنشا، ناۋرىز – جاڭارۋ مەن تازالىق ۋاقىتى. ول وي تازالىعى، سانا مەن نيەت تازالىعىن بىلدىرەتىن كەڭ ءماندى ۇعىم ەكەنىن اتاپ ءوتتى. قاسىم-جومارت توقاەۆ ەكى جىل بۇرىن باستالعان «تازا قازاقستان» جالپىۇلتتىق اكتسياسى حالىق، اسىرەسە جاستار تاراپىنان كەڭ قولداۋ تاپقانىن ايتتى.
"بارشاڭىزدى ۇلىستىڭ ۇلى كۇنى – ءاز-ناۋرىز مەيرامىمەن شىن جۇرەكتەن قۇتتىقتايمىن!
ءاز-ناۋرىز – تازارۋ، جاڭارۋ ۋاقىتى. تازالىق – ءمان-ماعىناسى كەڭ ۇعىم. بۇل – ەڭ الدىمەن، وي تازالىعى، سانا مەن نيەت تازالىعى دەگەن ءسوز.
وسىدان ەكى جىل بۇرىن ەلىمىزدە «تازا قازاقستان» جالپىۇلتتىق اكتسياسى باستاۋ الدى. اۋقىمدى جوبا حالىقتىڭ، اسىرەسە، جاستاردىڭ جاپپاي قولداۋىنا يە بولدى. ازاماتتارىمىز تازالىقتى قۇر سوزبەن ەمەس، ناقتى ىسىمەن كورسەتۋدە. ۇقىپتىلىق، جيناقىلىق، تياناقتىلىق قاسيەتتەرى ۇلتىمىزدىڭ جاڭا ساپاسىنا اينالا باستادى.
جالپى، «تازا قازاقستان» باستاماسى – جاي عانا كەزەكتى ساياسي ناۋقان نەمەسە ۇگىت-ناسيحات ەمەس، بۇل – مەملەكەتىمىزدىڭ مىزعىماس يدەولوگياسى. سوندىقتان وسى يگى ىسپەن ءبىز جىل بويى اينالىسۋىمىز كەرەك، بۇل ۇلت بولمىسىنىڭ اجىراماس بولىگى بولۋعا ءتيىس. اسىرەسە، ۇلىستىڭ ۇلى كۇنى تازالىق فيلوسوفياسىن كەڭىنەن دارىپتەۋ ماڭىزدى.
ۇلىستىڭ ۇلى كۇنى جەر انا دا، ەلىمىز دە جاڭارىپ جاتقان وسى تاريحي ساتتە ايتىلعان تىلەكتىڭ ءمان-ماعىناسى ايرىقشا دەپ ويلايمىن.
سوندىقتان ەڭ باستىسى ەلىمىزگە اماندىق، جەرىمىزگە تىنىشتىق تىلەيمىن.
قاسيەتتى وتانىمىز – قازاقستان رەسپۋبليكاسى ماڭگى جاساسىن!
اتا زاڭىمىز ءوز تۇعىرىنان تۇسپەسىن!
تۋىمىز بيىكتە جەلبىرەسىن!
ۇلىس وڭ بولسىن، اق مول بولسىن!" - دەدى پرەزيدەنت.
مەملەكەت باسشىسى تۇركىستان وبلىسىنا جۇمىس ساپارىمەن بارىپ، ناۋرىز مەرەكەسىنە قاتىستى.
ەلىمىزدىڭ ءتورت قۇبىلاسى تۇگەل بولسىن!
