Prezident Qasym-Jomart Toqaev barşa qazaqstandyqtardy Ūlystyŋ ūly künı – äz-Nauryz merekesımen şyn jürekten qūttyqtady, dep habarlaidy "Adyrna" ūlttyq portaly.
Prezidenttıŋ aituynşa, Nauryz – jaŋaru men tazalyq uaqyty. Ol oi tazalyǧy, sana men niet tazalyǧyn bıldıretın keŋ mändı ūǧym ekenın atap öttı. Qasym-Jomart Toqaev ekı jyl būryn bastalǧan «Taza Qazaqstan» jalpyūlttyq aksiiasy halyq, äsırese jastar tarapynan keŋ qoldau tapqanyn aitty.
"Barşaŋyzdy Ūlystyŋ ūly künı – äz-Nauryz meiramymen şyn jürekten qūttyqtaimyn!
Äz-Nauryz – tazaru, jaŋaru uaqyty. Tazalyq – män-maǧynasy keŋ ūǧym. Būl – eŋ aldymen, oi tazalyǧy, sana men niet tazalyǧy degen söz.
Osydan ekı jyl būryn elımızde «Taza Qazaqstan» jalpyūlttyq aksiiasy bastau aldy. Auqymdy joba halyqtyŋ, äsırese, jastardyŋ jappai qoldauyna ie boldy. Azamattarymyz tazalyqty qūr sözben emes, naqty ısımen körsetude. Ūqyptylyq, jinaqylyq, tiianaqtylyq qasietterı ūltymyzdyŋ jaŋa sapasyna ainala bastady.
Jalpy, «Taza Qazaqstan» bastamasy – jai ǧana kezektı saiasi nauqan nemese ügıt-nasihat emes, būl – memleketımızdıŋ myzǧymas ideologiiasy. Sondyqtan osy igı ıspen bız jyl boiy ainalysuymyz kerek, būl ūlt bolmysynyŋ ajyramas bölıgı boluǧa tiıs. Äsırese, Ūlystyŋ ūly künı tazalyq filosofiiasyn keŋınen därıpteu maŋyzdy.
Ūlystyŋ ūly künı Jer Ana da, elımız de jaŋaryp jatqan osy tarihi sätte aitylǧan tılektıŋ män-maǧynasy airyqşa dep oilaimyn.
Sondyqtan eŋ bastysy elımızge amandyq, jerımızge tynyştyq tıleimın.
Qasiettı Otanymyz – Qazaqstan Respublikasy mäŋgı jasasyn!
Ata zaŋymyz öz tūǧyrynan tüspesın!
Tuymyz biıkte jelbıresın!
Ūlys oŋ bolsyn, aq mol bolsyn!" - dedı Prezident.
Memleket basşysy Türkıstan oblysyna jūmys saparymen baryp, Nauryz merekesıne qatysty.
Elımızdıŋ tört qūbylasy tügel bolsyn!
