ارمەنيا كورشى ەلدەرگە تەرريتوريالىق تالاپتار قويماۋى كەرەك. بۇل تۋرالى ەلدىڭ ۇلتتىق جينالىسىنىڭ سپيكەرى الەن سيمونيان ايتتى، دەپ حابارلايدى «ادىرنا» ءتىلشىسى Report-قا سىلتەمە جاساپ.
«ارمەنيا كورشىلەرىنە ەشقاشان تەرريتوريالىق تالاپتار قويماۋى ءتيىس. ءبىز ايماقتا ەشبىر ەل ءبىر-بىرىنە شابۋىل جاساۋ تۋرالى ويلامايتىنداي قاتىناستار ورناتۋىمىز كەرەك. وڭىرىمىزدە بەيبىتشىلىكتى قامتاماسىز ەتۋ جانە سوعىستىڭ الدىن الۋ ءۇشىن ءبارىن جاساۋىمىز ءتيىس»، — دەدى ول جۋرناليستەرگە.
سيمونيان ارمەنيانىڭ جاڭا كونستيتۋتسياسىن قابىلداۋ تەك ەل مۇددەسىنە بايلانىستى ەكەنىن اتاپ ءوتتى.
«ارمەنيا كونستيتۋتسياسى مەن جوسپارلانعان تۇزەتۋلەر تەك مەملەكەت مۇددەسىنە ساي ەنگىزىلەدى. ولاردى ازەربايجان مۇددەسى ءۇشىن ەنگىزبەيمىز. بۇل تۇزەتۋلەر ارمەنيانىڭ ساقتالۋى مەن بولاشاعى ءۇشىن جاسالادى. كونستيتۋتسيا ەلىمىزدى وڭىردە ەشكىمگە قاۋىپ دەپ ساناتۋعا جول بەرمەۋى كەرەك»،- دەدى ول.
ارمەنيانىڭ ادىلەت ءمينيسترى سربۋي گاليان جاڭا كونستيتۋتسيا جوباسىنىڭ ءماتىنى دايىن ەكەنىن، ونى «ازاماتتىق كەلىسىم» پارتياسى مەن پارلامەنتتىك فراكتسياسىندا تالقىلاۋدى جوسپارلاپ وتىرعانىن حابارلادى. تالداۋ بارىسىندا دەكلاراتسياعا سىلتەمە تۋرالى سوڭعى شەشىم ءالى قابىلدانباعانى ايتىلدى.
