فوتو: gov.kz
الماتى قالاسىنىڭ ارحيتەكتۋرا جانە قالا قۇرىلىسى باسقارماسى قالا اۋماعىنداعى عيماراتتار سىرتىندا ورناتىلاتىن سىرتقى (ۆيزۋالدى) جارناما وبەكتىلەرىن ورنالاستىرۋ ەرەجەلەرىنە وزگەرىستەر ەنگىزۋ جوباسىن ازىرلەدى، دەپ حابارلايدى "ادىرنا".
جوبا پرەزيدەنتتىڭ تاپسىرمالارىن ورىنداۋ ماقساتىندا، تۇرعىندارعا ىڭعايلى، قاۋىپسىز جانە ەستەتيكالىق جاعىمدى قالالىق ورتانى قالىپتاستىرۋعا، سونداي-اق «الماتى – ەشقاشان ۇيىقتامايتىن قالا» كونتسەپتسياسىن ودان ءارى دامىتۋ شەڭبەرىندە ازىرلەنگەن.
قۇجات تۇرعىنداردىڭ ءومىر ءسۇرۋ جاعدايلارىن جاقسارتۋعا جانە كاسىپكەرلىك وبەكتىلەردىڭ تاۋلىك بويى جۇمىس ىستەۋىن قامتاماسىز ەتۋگە باعىتتالعان.
مەگاپوليستەردىڭ قازىرگى دامۋ تەندەنتسيالارى قالالىق ينفراقۇرىلىم ساپاسىن ارتتىرۋدى، ارحيتەكتۋرالىق ورتاداعى ۆيزۋالدى ۇيلەسىمدىلىكتى قامتاماسىز ەتۋدى، ءبىرتۇتاس ديزاين-كودتى قالىپتاستىرۋدى جانە قالا تۇرعىندارى مەن قوناقتارى ءۇشىن ىڭعايلى جاعداي جاساۋ قاجەتتىگىن تالاپ ەتەدى.
وسىعان بايلانىستى نورماتيۆتىك رەتتەۋدى جەتىلدىرۋ، قولدانىستاعى تالاپتاردى قالالىق ورتانى تۇراقتى دامىتۋ مىندەتتەرىنە سايكەستەندىرۋ قاجەت دەپ جوبانى ازىرلەۋشىلەر اتاپ كورسەتكەن.
ۇسىنىلىپ وتىرعان وزگەرىستەر:
-
قالالىق ينفراقۇرىلىم وبەكتىلەرىنە قويىلاتىن تالاپتاردى رەتكە كەلتىرۋ;
-
قالا ساۋلەت بەينەسىنىڭ ەستەتيكالىق تۇتاستىعىن قامتاماسىز ەتۋ;
-
شاعىن جانە ورتا بيزنەس دامۋىنا قولايلى جاعداي جاساۋ;
-
قالانىڭ ينۆەستيتسيالىق تارتىمدىلىعىن ارتتىرۋ;
-
الماتىنىڭ ديناميكالىق دامىپ كەلە جاتقان مەگاپوليس رەتىندە زاماناۋي جانە تانىمال ءيميدجىن قالىپتاستىرۋ.
وزگەرىستەردى قابىلداۋ سايكەس سالاعا جۇيەلى كوزقاراسپەن رەتتەۋدى قامتاماسىز ەتىپ، قالالىق ورتانىڭ ساپاسىن ارتتىرۋعا جانە قالانىڭ تۇراقتى دامۋىن جالعاستىرۋ ءۇشىن جاعداي جاساۋعا مۇمكىندىك بەرەدى دەپ كورسەتىلگەن.
جوبا «اشىق نقا» پورتالىندا 2026 جىلدىڭ 10 ساۋىرىنە دەيىن قوعامدىق تالقىلاۋعا قويىلعان.
ايتا كەتەيىك، سوڭعى كۇندەرى الماتى قالاسىندا جول اپاتى جيىلەپ كەتتى. 21 ناۋرىزعا قاراعان ءتۇنى شامامەن ساعات 03:30 كەزىندە ءال-فارابي داڭعىلى بويىندا 3 ادام قازا تاپقان كولىك اپاتى ورىن العان بولاتىن.
