وزبەكستان پرەزيدەنتى شاۆكات ميرزيوەۆ تاجىكستان پرەزيدەنتى ەمومالي راحمون سوڭعى جىلدارى قارقىندى دامىپ كەلە جاتقان وزبەك-تاجىك ىنتىماقتاستىعىن جاڭا دەڭگەيگە كوتەرەتىن ماڭىزدى قادام جاسادى. شاۆكات ميرزيوەۆتىڭ دۋشانبەگە ساپارى بارىسىندا ەكى ەل باسشىسى بىرلەسكەن 10 ونەركاسىپتىك كووپەراتسيا جوباسىنىڭ ىسكە قوسىلۋىنا قاتىسىپ، ەكونوميكالىق ارىپتەستىكتى تەرەڭدەتۋگە باعىتتالعان اۋقىمدى كەلىسىمدەرگە قول قويدى، دەپ حابارلايدى “ادىرنا”.
جاڭا جوبالار ەكى ەلدىڭ وندىرىستىك الەۋەتىن ارتتىرۋعا جانە ءوزارا ساۋدا-ەكونوميكالىق بايلانىستاردى نىعايتۋعا باعىتتالعان. اتاپ ايتقاندا، جيھاز جانە بىلعارى ونىمدەرىن شىعاراتىن كاسىپورىندار قۇرۋ، تۇرمىستىق تەحنيكا ءوندىرىسىن كەڭەيتۋ، تاجىكستان اۋماعىندا توقىما ءوندىرىسىن دامىتۋ كوزدەلىپ وتىر. سونىمەن قاتار، تاشكەنتتە تۇرعىن ءۇي كەشەندەرى مەن ساۋدا نىساندارى سالىنىپ، فەرعانا وبلىسىندا كونسەرۆى ونىمدەرىن شىعارۋ جولعا قويىلادى.
ونەركاسىپتىك باعىتپەن قاتار، اگروونەركاسىپ سالاسى دا نازاردان تىس قالعان جوق. ءاندىجان وبلىسىندا ءسۇت ونىمدەرىن ءوندىرۋ، ال سۋرحانداريا وبلىسىندا جەمىس شىرىندارى مەن مەتالل بريكەتتەرىن شىعارۋ جوبالارى ىسكە قوسىلدى. بۇل باستامالار وڭىرلەردەگى ءوندىرىس كولەمىن ۇلعايتىپ، جاڭا جۇمىس ورىندارىن اشۋعا مۇمكىندىك بەرەدى.
كەلىسسوزدەر ناتيجەسىندە تاراپتار ستراتەگيالىق ارىپتەستىك پەن وداقتاستىق قاتىناستاردى نىعايتۋ تۋرالى بىرلەسكەن مالىمدەمە قابىلدادى. سونداي-اق ۇكىمەتارالىق جانە ۆەدومستۆوارالىق دەڭگەيدە بىرقاتار قۇجاتتارعا قول قويىلىپ، ساۋدا اينالىمىن ارتتىرۋ، ونەركاسىپتىك كووپەراتسيانى دامىتۋ جانە زاماناۋي تسيفرلىق شەشىمدەردى ەنگىزۋ ماسەلەلەرى قامتىلدى. اتاپ ايتقاندا، تاۋارلاردىڭ شىعۋ تەگىن ەلەكتروندى سەرتيفيكاتتاۋ جۇيەسىن ەنگىزۋ جانە «E-Permit» جۇيەسىن پايدالانۋ جوسپارلانىپ وتىر.
بۇدان بولەك، دەنساۋلىق ساقتاۋ، عىلىم جانە شەكارا ماڭىنداعى راديوجيىلىكتەردى رەتتەۋ سالالارىندا دا ىنتىماقتاستىقتى كەڭەيتۋ تۋرالى كەلىسىمدەرگە قول جەتكىزىلدى. ەكى ەل 2026–2028 جىلدارعا ارنالعان بىرقاتار باعدارلامالار مەن «جول كارتالارىن» بەكىتىپ، ونەركاسىپ، يننوۆاتسيا، تاۋ-كەن ءوندىرىسى، تۋريزم، اۋىل شارۋاشىلىعى جانە مادەني-گۋمانيتارلىق بايلانىستاردى دامىتۋعا باسىمدىق بەردى.
ساپار اياسىندا سيمۆولدىق ماڭىزى بار تاعى ءبىر وقيعا ورىن الدى — جاڭا تاشكەنت قالاسىنداعى كوشەلەردىڭ بىرىنە دۋشانبە قالاسىنىڭ اتاۋى بەرىلدى. بۇل ەكى حالىق اراسىنداعى دوستىق پەن ءوزارا قۇرمەتتىڭ بەلگىسى رەتىندە باعالانۋدا.
ساراپشىلاردىڭ پىكىرىنشە، سوڭعى جىلدارى وزبەكستان مەن تاجىكستان اراسىنداعى ەكونوميكالىق بايلانىستار ايتارلىقتاي نىعايعان. ماسەلەن، 2025 جىلى ەكى ەل اراسىنداعى تاۋار اينالىمى 718,3 ملن اقش دوللارىنا جەتىپ، ءبىر جىل ىشىندە 22,5%-عا وسكەن. بۇل كورسەتكىشتەر ەكىجاقتى ىنتىماقتاستىقتىڭ تۇراقتى ءوسىم تراەكتورياسىندا ەكەنىن كورسەتەدى.
جالپى العاندا، ىسكە قوسىلعان جاڭا جوبالار مەن قول قويىلعان كەلىسىمدەر ورتالىق ازياداعى وڭىرارالىق ينتەگراتسيانى كۇشەيتىپ، ەكى ەلدىڭ ەكونوميكالىق دامۋىنا سەرپىن بەرەدى دەپ كۇتىلۋدە.
