باتىس قازاقستان وبلىسىنىڭ تەرەكتى اۋدانى پودستەپنوە كەنتىندە وقۋشىلار مىنگەن اۆتوبۋس پەن قوعامدىق كولىك سوقتىعىسىپ، جول اپاتى بولدى، دەپ حابارلايدى "ادىرنا" ۇلتتىق پورتالى "موي گورود" باسىلىمىنا سىلتەپ.
وبلىستىق پوليتسيا دەپارتامەنتىنىڭ حابارلاۋىنشا، قوعامدىق كولىك جۇرگىزۋشىسى ۇستالىپ، ۋاقىتشا ۇستاۋ يزولياتورىنا قامالعان. مالىمەتتەرگە قاراعاندا، سامارا - شىمكەنت تاس جولىندا جاقىن قاشىقتىققا جولاۋشى تاسىمالدايتىن اۆتوبۋس مەكتەپ وقۋشىلارىنا ارنالعان اۆتوبۋستى قاعىپ كەتكەن. پوليتسيا تاراتقان حابارلامادا زارداپ شەككەندەر بار ەكەنى ايتىلادى. "باقىتقا قاراي ەشكىم قازا تاپقان جوق. زارداپ شەككەندەردىڭ بارىنە مەديتسينالىق كومەك كەرسەتىلدى", - دەلىنگەن حابارلامادا.
"موي گورود" رەداكتسياسىنىڭ مالىمەتىنشە، اپات سالدارىنان 24 بالا زارداپ شەكتى. زارداپ شەككەندەردىڭ 20-ءسى پودستەپنوە كەنتىندەگى №2 ورتا مەكتەپتىڭ وقۋشىلارى بولعان.
قازىرگى ۋاقىتتا بالالاردىڭ جاعدايى تۇراقتى، ال پوليتسيا وقيعانىڭ سەبەپتەرى مەن جاعدايىن انىقتاپ جاتىر.
