شىمكەنتتە 21 جاستاعى نۇراي سەرىكبايدىڭ ولىمىنە قاتىستى ءىس بويىنشا جاڭا مالىمەتتەر بەلگىلى بولدى، دەپ حابارلايدى «ادىرنا» ءتىلشىسى.
قالالىق پد مالىمەتىنشە، كۇدىكتى مامانداندىرىلعان مەكەمەگە ءماجبۇرلى ەمدەۋگە جىبەرىلگەن.
«كۇدىكتىگە قاتىستى كىسى ءولتىرۋ، نەكەگە تۇرۋعا ماجبۇرلەۋ جانە ستالكينگ دەرەكتەرى بويىنشا تەرگەۋ امالدارى جالعاسۋدا. قىلمىستىق ءىس باقىلاۋعا الىنعان. ەكى مارتە جۇرگىزىلگەن سوت-پسيحياتريالىق ساراپتامانىڭ قورىتىندىسى بويىنشا كۇدىكتىنىڭ بويىنان پسيحيكالىق اۋىتقۋلار انىقتالدى. وسىعان بايلانىستى ول مامانداندىرىلعان مەكەمەگە ءماجبۇرلى تۇردە ەمدەلۋگە جىبەرىلدى»،- دەلىنگەن حابارلامادا.
دەپارتامەنت وكىلدەرى تەرگەۋشىلەردىڭ جابىرلەنۋشى تاراپپەن تۇراقتى بايلانىستا ەكەنىن اتاپ ءوتتى.
«قابىلدانعان بارلىق پروتسەستىك شەشىم بويىنشا تۇسىنىكتەمەلەر بەرىلىپ جاتىر. زاڭدا بەلگىلەنگەن تارتىپپەن تەرگەۋ بارىسى تۋرالى اقپارات جەتكىزىلىپ، ساراپتاما ناتيجەلەرى مەن ءىستىڭ وزگە دە ماتەريالدارى تانىستىرىلۋدا. ازاماتتاردى تەك رەسمي اقپاراتقا سەنۋگە شاقىرامىز. كورىنەۋ جالعان مالىمەت تاراتقانى ءۇشىن، ءتىپتى قىلمىستىق جاۋاپتىلىققا دەيىن شارا قولدانىلاتىنىن ەسكەرتەمىز»، - دەپ ءتۇسىندىردى پوليتسيا.
ەستەرىڭىزگە سالايىق، 11 قاڭتاردا شىمكەنتتەگى كوپقاباتتى تۇرعىن ءۇيدىڭ ماڭىنان جاس قىزدىڭ ءمايىتى تابىلعان ەدى. مارقۇمنىڭ دەنەسىندە پىشاق جاراقاتتارى بولعان. 13 قاڭتاردا كۇدىكتىنىڭ شىمكەنتتەن 10 شاقىرىم جەردە ۇستالعانى ايتىلدى.
