Şymkentte 21 jastaǧy Nūrai Serıkbaidyŋ ölımıne qatysty ıs boiynşa jaŋa mälımetter belgılı boldy, dep habarlaidy «Adyrna» tılşısı.
Qalalyq PD mälımetınşe, küdıktı mamandandyrylǧan mekemege mäjbürlı emdeuge jıberılgen.
«Küdıktıge qatysty kısı öltıru, nekege tūruǧa mäjbürleu jäne stalking derekterı boiynşa tergeu amaldary jalǧasuda. Qylmystyq ıs baqylauǧa alynǧan. Ekı märte jürgızılgen sot-psihiatriialyq saraptamanyŋ qorytyndysy boiynşa küdıktınıŋ boiynan psihikalyq auytqular anyqtaldy. Osyǧan bailanysty ol mamandandyrylǧan mekemege mäjbürlı türde emdeluge jıberıldı»,- delıngen habarlamada.
Departament ökılderı tergeuşılerdıŋ jäbırlenuşı tarappen tūraqty bailanysta ekenın atap öttı.
«Qabyldanǧan barlyq prosestık şeşım boiynşa tüsınıktemeler berılıp jatyr. Zaŋda belgılengen tärtıppen tergeu barysy turaly aqparat jetkızılıp, saraptama nätijelerı men ıstıŋ özge de materialdary tanystyryluda. Azamattardy tek resmi aqparatqa senuge şaqyramyz. Körıneu jalǧan mälımet taratqany üşın, tıptı qylmystyq jauaptylyqqa deiın şara qoldanylatynyn eskertemız», - dep tüsındırdı polisiia.
Esterıŋızge salaiyq, 11 qaŋtarda Şymkenttegı köpqabatty tūrǧyn üidıŋ maŋynan jas qyzdyŋ mäiıtı tabylǧan edı. Marqūmnyŋ denesınde pyşaq jaraqattary bolǧan. 13 qaŋtarda küdıktınıŋ Şymkentten 10 şaqyrym jerde ūstalǧany aityldy.
