اقش پرەزيدەنتى دونالد ترامپ يرانعا قاتىستى قاتاڭ ريتوريكاسىن جالعاستىرىپ، ورمۋز بۇعازى اشىلماعان جاعدايدا اسكەري سوققىلار جاسالاتىنىن مالىمدەدى. بۇل تۋرالى ول جەكسەنبى كۇنى الەۋمەتتىك جەلىدەگى پاراقشاسىندا جازدى، دەپ حابارلايدى “ادىرنا”.
پرەزيدەنتتىڭ ايتۋىنشا، ەگەر ستراتەگيالىق ماڭىزى بار ورمۋز بۇعازى سەيسەنبىگە دەيىن قايتا اشىلماسا، اقش يران اۋماعىنداعى ەلەكتر ستانتسيالارى مەن كوپىرلەردى نىساناعا الۋى مۇمكىن.
«سەيسەنبى – يران ءۇشىن “ەلەكتر ستانتسيالارى كۇنى” جانە “كوپىرلەر كۇنى” بولادى، ءبارى ءبىر كۇندە جۇزەگە اسادى. بۇعان ۇقساس نارسە بۇرىن-سوڭدى بولماعان!» – دەپ جازدى ترامپ Truth Social جەلىسىندە.
ول بۇل مالىمدەمەسىندە اقش پەن ءيزرايلدىڭ ءبىر ايدان استام ۋاقىت بۇرىن يرانعا جاساعان شابۋىلدارىنان كەيىن تەگەران ءىس جۇزىندە جاۋىپ تاستاعان ماڭىزدى تەڭىز جولى – ورمۋز بۇعازىنا سىلتەمە جاسادى.
«بۇعازدى اشىڭدار، اقىماقتار، ايتپەسە توزاقتا ءومىر سۇرەسىڭدەر! اللاعا ماداق بولسىن» دەگەن سوزدەرمەن اياقتادى.
ترامپ ءوز مالىمدەمەسىندە يرانعا ۋلتيماتۋم قويىپ، تالاپ ورىندالماعان جاعدايدا اۋىر سالدارلار بولاتىنىن ەسكەرتتى. سونىمەن قاتار، ول دۇيسەنبى كۇنى اق ۇيدە اسكەري وكىلدەردىڭ قاتىسۋىمەن ارنايى ءباسپاسوز كونفەرەنتسياسىن وتكىزەتىنىن جەتكىزدى.
بۇل مالىمدەمە يران اۋماعىندا جۇرگىزىلگەن امەريكالىق ەكى ۇشقىشتى قۇتقارۋ وپەراتسياسىنان كەيىن جاسالدى. اقش بيلىگىنىڭ مالىمەتىنشە، وپەراتسيا وتە كۇردەلى جاعدايدا وتكەن. قۇتقارىلعان ۇشقىشتاردىڭ ءبىرى اۋىر جاراقات العان.
