ءال-فارابي داڭعىلىندا بولعان رەزونانستى جول-كولىك وقيعاسىنا كۇدىكتى دەپ تانىلعان Zeekr كولىگىنىڭ جۇرگىزۋشىسى اۋرۋحانادان تەرگەۋ يزولياتورىنا اۋىستىرىلدى. بۇل تۋرالى الماتى قالالىق پوليتسيا دەپارتامەنتىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«اپات سالدارىنان ءۇش ادام قازا تاپتى. كۇدىكتى بۇعان دەيىن مەديتسينالىق مەكەمەدە كۇزەتپەن بولعان جانە سوت سانكتسياسىمەن قاماۋعا الىنعان ەدى. قازىرگى ۋاقىتتا ول قىلمىستىق ءىس اياسىندا قاماۋدا ۇستاۋ ءۇشىن تەرگەۋ يزولياتورىنا جەتكىزىلدى»، - دەلىنگەن سەيسەنبى كۇنگى حابارلامادا.
ەسكە سالايىق، قايعىلى وقيعا 21 ناۋرىز كۇنى ءال-فارابي داڭعىلى بويىندا بولعان ەدى. Zeekr 9X ماركالى كولىك قارسى باعىتقا شىعىپ كەتىپ، Mercedes اۆتوكولىگىمەن بەتپە-بەت سوقتىعىسقانى تۋرالى ايتىلدى. جول اپاتى سالدارىنان 29 جاستاعى جۇرگىزۋشى جانە 20 مەن 22 جاستاعى ەكى جولاۋشى وقيعا ورنىندا قازا تاپتى.
الەۋمەتتىك جەلىلەردە تاراعان اقپاراتقا سايكەس، Zeekr كولىگىن 32 جاستاعى الماتىلىق كاسىپكەر باسقارعان. كۋاگەرلەردىڭ ايتۋىنشا، اپات بولعان ساتتە كولىك باسقا اۆتوكولىكپەن جارىسقا تۇسكەن بولۋى مۇمكىن.
26 ناۋرىزدا پوليتسيا تۇنگى جارىستارعا قارسى كۇرەس كۇشەيتىلەتىنىن مالىمدەدى. سول كۇنى ءماجىلىس دەپۋتاتى مۇرات ابەنوۆ الماتىداعى ولىمگە اكەلگەن جارىسقا جوعارى لاۋازىمدى پوليتسيا قىزمەتكەرىنىڭ قاتىسى بولۋى مۇمكىن دەگەن كۇدىگىن ايتىپ، ونى بەينەماتەريالمەن نەگىزدەدى. وسىدان كەيىن الماتى پوليتسياسىندا قىزمەتتىك تەكسەرىس باستالىپ، كەيىن ىشكى ىستەر ءمينيسترى ەرجان سادەنوۆ بىرقاتار باسشىلار قىزمەتىنەن بوساتىلعانىن حابارلادى. سونىمەن قاتار ءىىم بىردەن بىرنەشە قىلمىستىق ءىس قوزعالعانىن مالىمدەپ، رەزونانستان كەيىن الماتى جولدارىندا قاۋىپسىزدىك شارالارى كۇشەيتىلدى.
4 ساۋىردە پرەزيدەنت قاسىم-جومارت توقاەۆتىڭ جول اپاتىنا بايلانىستى مينيستر سادەنوۆكە تاپسىرما بەرگەنى بەلگىلى بولدى. 6 ساۋىردە ءىىم پوليتسيا كوشەلەردى جاسىرىن تۇردە پاترۋلدەۋدى باستاعانىن مالىمدەدى.
