استانا – قوستاناي اۆتوجولىندا بولعان جول-كولىك وقيعاسى سالدارىنان ايتىسكەر، مادەنيەت سالاسىنىڭ ۇزدىگى، تاريح عىلىمدارىنىڭ ماگيسترى سالتانات وتەلباەۆا مەن ونىڭ جۇبايى مىرزابەك قاسىموۆ قازا تاپتى، دەپ حابارلايدى "ادىرنا" ۇلتتىق پورتالى.
قارالى حاباردى مارقۇمنىڭ ارىپتەسى مارعۇلان وسپانوۆ مالىمدەدى. ونىڭ ايتۋىنشا، ەرلى-زايىپتىلار استانادان تاڭعى ساعات 04:00 شاماسىندا جولعا شىعىپ، مەكتەپ ءبىتىرۋ سالتاناتىنا اسىعىپ بارا جاتقان. بۇگىن ولاردىڭ قىزى التىنايعا قىزىل اتتەستات تابىستالۋى ءتيىس بولعان. مارعۇلان وسپانوۆتىڭ مالىمەتىنشە، جول-كولىك وقيعاسى اتباسار مەن ەسىل قالالارىنىڭ اراسىنداعى تاسجولدا بولعان. سونداي-اق ول وتباسىنىڭ جالعىز ۇلى نۇرسۇلتاننىڭ اتا-اناسىنان ايىرىلعانىن حابارلاعانىن جەتكىزدى.
ارىپتەستەرىنىڭ ايتۋىنشا، سالتانات وتەلباەۆا ۇزاق جىلدار بويى ىبىراي التىنسارين مۋزەيىندە ەڭبەك ەتىپ، باسشىنىڭ ورىنباسارى قىزمەتىن اتقارعان. ول مادەني مۇرانى ساقتاۋ، عىلىمي-زەرتتەۋ جۇمىستارىن ۇيىمداستىرۋ جانە تاريحي قۇندىلىقتاردى ناسيحاتتاۋ باعىتىندا ەلەۋلى ەڭبەك سىڭىرگەن.
قازىر الەۋمەتتىك جەلىلەردە قوعام وكىلدەرى، ارىپتەستەرى مەن جاقىندارى مارقۇمداردىڭ وتباسىنا كوڭىل ايتىپ، قايعىلارىنا ورتاقتاسىپ جاتىر.
