قازاقستاندىق قىتايتانۋشى، فاتيما داۋلەت قىتايدى زەرتتەۋدەگى 30 جىلدان استام تاجىريبەسىمەن ءبولىسىپ، ەل تۋرالى كوزقاراستىڭ قالاي وزگەرگەنىن ايتتى، دەپ حابارلايدى "ادىرنا" ۇلتتىق پورتالى «China News» باسىلىمىنا سىلتەپ.
عالىمنىڭ ايتۋىنشا، ونىڭ قىتايعا دەگەن قىزىعۋشىلىعى العاش رەت لۋ سين مەن لاو شە شىعارمالارىن وقۋدان باستالعان. ادەبي كەيىپكەرلەر ارقىلى قوعامداعى ادىلەتسىزدىك پەن الەۋمەتتىك تەڭسىزدىكتى تۇسىنگەن ول، كەيىن بۇل قىزىعۋشىلىقتى عىلىمي زەرتتەۋگە ۇلاستىرعان.
فاتيما داۋلەت قىتايعا العاش رەت 1993 جىلى بارعانىن اتاپ ءوتتى. ونىڭ سوزىنشە، ادەبي شىعارمالارداعى قىتاي مەن ناقتى ومىردەگى ەلدىڭ اراسىندا ايىرماشىلىق بار ەكەنىن سول كەزدە اڭعارعان. اسىرەسە شىڭجاڭ وڭىرىندەگى كوپۇلتتى ورتا مەن مادەني ارتۇرلىلىك ەرەكشە اسەر قالدىرعان. ال 1999 جىلى العاش بارعان بەيجىڭ قالاسى عالىم ءۇشىن «ادەبي قالاعا» اينالعان.
ساراپشى سوڭعى 30 جىلدا قىتايدا ەكونوميكالىق دامۋ عانا ەمەس، قوعامنىڭ قۇندىلىقتارى مەن ويلاۋ جۇيەسىندە دە ۇلكەن وزگەرىستەر بولعانىن اتاپ ءوتتى. ونىڭ پىكىرىنشە، ەلدىڭ دامۋىن ءتۇسىنۋ ءۇشىن تەك ستاتيستيكا ەمەس، ادامداردىڭ دۇنيەتانىمى مەن تىلدىك ەرەكشەلىكتەرىن زەرتتەۋ ماڭىزدى.
سونىمەن قاتار، ول قازاقستان قوعامىنىڭ قىتايعا دەگەن كوزقاراسى دا وزگەرگەنىن ايتتى. بۇرىنعى ستەرەوتيپتەردىڭ ازايىپ، قىزىعۋشىلىق پەن راتسيونالدى تۇسىنىكتىڭ ارتقانىن جەتكىزدى. اسىرەسە ء«بىر بەلدەۋ – ءبىر جول» باستاماسىنان كەيىن ەكى ەل اراسىنداعى بايلانىس كۇشەيگەن.
سۇحبات سوڭىندا ول قازاقستان مەن قىتاي اراسىنداعى مادەني بايلانىستاردىڭ بولاشاعىنا توقتالىپ، ءوزارا قۇرمەت پەن اشىق ديالوگ ساقتالعان جاعدايدا ەكىجاقتى ىنتىماقتاستىقتىڭ ودان ءارى دامي تۇسەتىنىنە سەنىم ءبىلدىردى.
