Qazaqstandyq qytaitanuşy, Fatima Däulet Qytaidy zertteudegı 30 jyldan astam täjıribesımen bölısıp, el turaly közqarastyŋ qalai özgergenın aitty, dep habarlaidy "Adyrna" ūlttyq portaly «China News» basylymyna sıltep.
Ǧalymnyŋ aituynşa, onyŋ Qytaiǧa degen qyzyǧuşylyǧy alǧaş ret Lu Sin men Lao Şe şyǧarmalaryn oqudan bastalǧan. Ädebi keiıpkerler arqyly qoǧamdaǧy ädıletsızdık pen äleumettık teŋsızdıktı tüsıngen ol, keiın būl qyzyǧuşylyqty ǧylymi zertteuge ūlastyrǧan.
Fatima Däulet Qytaiǧa alǧaş ret 1993 jyly barǧanyn atap öttı. Onyŋ sözınşe, ädebi şyǧarmalardaǧy Qytai men naqty ömırdegı eldıŋ arasynda aiyrmaşylyq bar ekenın sol kezde aŋǧarǧan. Äsırese Şyŋjaŋ öŋırındegı köpūltty orta men mädeni ärtürlılık erekşe äser qaldyrǧan. Al 1999 jyly alǧaş barǧan Beijıŋ qalasy ǧalym üşın «ädebi qalaǧa» ainalǧan.
Sarapşy soŋǧy 30 jylda Qytaida ekonomikalyq damu ǧana emes, qoǧamnyŋ qūndylyqtary men oilau jüiesınde de ülken özgerıster bolǧanyn atap öttı. Onyŋ pıkırınşe, eldıŋ damuyn tüsınu üşın tek statistika emes, adamdardyŋ dünietanymy men tıldık erekşelıkterın zertteu maŋyzdy.
Sonymen qatar, ol Qazaqstan qoǧamynyŋ Qytaiǧa degen közqarasy da özgergenın aitty. Būrynǧy stereotipterdıŋ azaiyp, qyzyǧuşylyq pen rasionaldy tüsınıktıŋ artqanyn jetkızdı. Äsırese «Bır beldeu – bır jol» bastamasynan keiın ekı el arasyndaǧy bailanys küşeigen.
Sūhbat soŋynda ol Qazaqstan men Qytai arasyndaǧy mädeni bailanystardyŋ bolaşaǧyna toqtalyp, özara qūrmet pen aşyq dialog saqtalǧan jaǧdaida ekıjaqty yntymaqtastyqtyŋ odan ärı dami tüsetınıne senım bıldırdı.
