قازاقستان ميتروپوليالىق وكرۋگى بۇرىنعى يەروموناح ياكوۆ ۆورونتسوۆقا قاتىستى قىلمىستىق قۋدالاۋ تۋرالى حاباردار ەكەنىن ايتتى، دەپ حابارلايدى «ادىرنا» ءتىلشىسى Bes.media-عا سىلتەمە جاساپ.
پروتويەرەي الەكساندر سۋۆوروۆ جۋرناليستەرگگە بەرگەن جاۋابىندا «قىلمىستىق ىستەرگە بايلانىستى شىركەۋ قۇرىلىمدارى قۇقىق قورعاۋ ورگاندارىنا نەمەسە ۆورونتسوۆتىڭ وزىنە قىسىم كورسەتتى» دەگەن كەز كەلگەن مالىمدەمەنى ءۇزىلدى-كەسىلدى جوققا شىعاردى.
«بۇعان قاراما-قارسى بارلىق مالىمدەمە شىندىققا سايكەس كەلمەيدى»، — دەلىنگەن حابارلامادا.
ياكوۆ ۆورونتسوۆ — ورىس پراۆوسلاۆيە شىركەۋىنىڭ استانا جانە الماتى ەپارحياسىنىڭ بۇرىنعى يەروموناحى. ول ۋكرايناداعى سوعىسقا قارسى مالىمدەمەلەرىمەن جانە رەسەي پراۆوسلاۆ شىركەۋىن ۇنەمى سىنايتىنىمەن تانىمال بولعان ەدى.
سوڭعى جىلدارى ۆورونتسوۆ ماسكەۋ پاتريارحاتىنا باعىنبايتىن شىركەۋ قۇرۋعا ارەكەتتەنگەن ەدى. الايدا ول ادىلەت مينيسترلىگىنەن رۇقسات الا المادى. وتكەن قىستا بۇرىنعى يەروموناح بۇل شەشىمدى سوتتا داۋلاعان، ءبىراز ۋاقىتتان كەيىن ول قاماۋعا الىندى.
قۇقىق قورعاۋ ورگاندارى ۆورونتسوۆقا قىلمىستىق كودەكستىڭ ەكى بابى بويىنشا ايىپ تاقتى: 302-باپ (ەسىرتكى پريتونىن ۇستاۋ) جانە 296-باپ (وتكىزۋ ماقساتىنسىز ەسىرتكىنى ساقتاۋ). ال بۇرىنعى ءدىن قىزمەتكەرىنىڭ ءوزى وزىنە قارسى تەرگەۋ قولدان جاسالعانىن مالىمدەيدى.
ايتا كەتۋ كەرەك، ميتروپوليالىق وكرۋگ ۆورونتسوۆتىڭ باستاماسىنا تەرىس قاراعان. ولاردىڭ پىكىرىنشە، قازاقستانداعى پراۆوسلاۆيە شىركەۋى – رپتس قۇرامىنىڭ ءبىر بولىگى جانە ودان بولەك ءومىر سۇرە المايدى.
«كانوندىق يۋريسديكتسيادان تىس (سونىڭ ىشىندە باسقا پاتريارحاتقا جۇگىنۋ ارقىلى) پاراللەل شىركەۋ قۇرىلىمىن قۇرۋعا باعىتتالعان كەز كەلگەن ارەكەت جىككە ءبولىنۋ رەتىندە باعالانادى»، — دەپ اتاپ ءوتتى ەپارحيا وكىلدەرى.
سونداي-اق ولار پراۆوسلاۆيە ءدىنىن ۇستانۋشىلاردى مۇنداي باستامالاردى قولداماۋعا شاقىرىپ، «ولارعا قول قويۋ نەمەسە قاتىسۋ جىكشىلدىككە ورتاقتاسۋ رەتىندە قاراستىرىلاتىنىن» ەسكەرتتى.
