ەلىمىزدە پسيحولوگتاردىڭ قىزمەتىن رەتتەيتىن دەربەس زاڭ پايدا بولادى. بۇل تۋرالى ءماجىلىستىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
بۇگىن، 8 ساۋىردە دەپۋتاتتار «پسيحولوگيالىق قىزمەت تۋرالى» زاڭ جوباسىن ءبىرىنشى وقىلىمدا ماقۇلدادى. قۇجات سالاداعى قۇقىقتىق بازانى قالىپتاستىرۋعا جانە پسيحولوگيالىق كومەكتىڭ قولجەتىمدىلىگى، ساپاسى مەن قاۋىپسىزدىگىن قامتاماسىز ەتۋگە باعىتتالعان.
زاڭ جوباسى اياسىندا سالاداعى نەگىزگى ۇعىمدار ايقىندالادى. اتاپ ايتقاندا، «پسيحولوگ»، «پسيحولوگيالىق قىزمەت»، «اقپاراتتاندىرىلعان كەلىسىم»، «پسيحولوگيالىق كومەكتىڭ ساپاسى»، «كاسىبي قۇپيالىلىق» سياقتى تۇسىنىكتەر ەنگىزىلەدى. بۇل رەتتە قۇجاتتىڭ قولدانىس اياسى مەديتسينالىق قىزمەتكە تارالمايتىنى ناقتى كورسەتىلگەن.
زاڭ جوباسىنىڭ نەگىزگى ماقساتى – حالىقتىڭ ءومىر ءسۇرۋ ساپاسى مەن پسيحولوگيالىق جاعدايىن جاقسارتۋ. سونداي-اق زاڭدىلىق، ەرىكتىلىك، قۇپيالىلىق، كاسىبي قۇزىرەتتىلىك، عىلىمي نەگىزدىلىك جانە زيان كەلتىرۋگە جول بەرمەۋ قاعيداتتارى بەلگىلەنگەن.
ماقۇلدانعان زاڭ جوباسىندا پسيحولوگتاردىڭ بىلىمىنە، قايتا دايارلاۋعا جانە بىلىكتىلىگىن راستاۋعا قويىلاتىن تالاپتار بەلگىلەنەدى. ولار مىندەتتى تۇردە مەملەكەتتىك تىزىلىمگە ەنگىزىلۋى ءتيىس. سونداي-اق كاسىبي دايارلىق پەن قايتا دايارلاۋ تالاپتارى جۇيەلەنىپ، كەمىندە بەس جىلدا ءبىر رەت بىلىكتىلىكتى ارتتىرۋ مىندەتى قاراستىرىلعان.
زاڭ جوباسىندا پسيحولوگتاردىڭ قۇزىرەتتەرى مەن قىزمەت مازمۇنىنا قويىلاتىن تالاپتاردى ايقىندايتىن كاسىبي ستاندارتقا قاتىستى نورمالار ەنگىزىلگەن.
بۇدان بولەك، زاڭ جوباسىندا پسيحولوگتاردىڭ قۇقىقتارى مەن مىندەتتەرى بەكىتىلەدى. ولاردىڭ قاتارىندا ەتيكالىق نورمالاردى ساقتاۋ، اقپاراتتاندىرىلعان كەلىسىم الۋ، قۇپيالىلىقتى قامتاماسىز ەتۋ، كاسىبي قۇپيانى ساقتاۋ جانە كليەنتتىڭ كەلىسىمىنسىز اقپاراتتى ءۇشىنشى تۇلعالارعا بەرمەۋ تالاپتارى بار.
قۇجاتتا پسيحولوگيالىق كومەك الۋشىلاردىڭ قۇقىقتارى دا ايقىندالعان. اتاپ ايتقاندا، ماماندى تاڭداۋ، تولىق اقپارات الۋ، كومەكتەن باس تارتۋ، ءوز قۇقىقتارىن قورعاۋ جانە شەشىم قابىلداۋعا قاتىسۋ مۇمكىندىگى قاراستىرىلعان.
سونىمەن قاتار مەديتسينالىق قىزمەتتى جۇزەگە اسىرۋعا جانە دارىلىك ەم تاعايىنداۋعا تىيىم سالىنادى. بۇدان بولەك، پسيحولوگيالىق قىزمەت تۋرالى جالعان اقپارات تاراتۋعا جانە قىزمەت ناتيجەسىنە كەپىلدىك بەرىلەتىنىن مالىمدەۋگە جول بەرىلمەيدى.
