استاناداعى ەڭ تانىمال نىسانداردىڭ ءبىرى "حان شاتىر" ساۋدا-ويىن-ساۋىق ورتالىعى ساتىلىمعا قويىلدى دەگەن حابارلاندىرۋ جەلىدە قىزۋ تالقىلاندى، دەپ حابارلايدى "ادىرنا" ۇلتتىق پورتالى.
تانىمال جىلجىمايتىن مۇلىك سايتتارىنىڭ بىرىندە جاريالانعان حابارلاندىرۋدا ساتۋشى ءوزىن نىساننىڭ يەسى رەتىندە تانىستىرعان. وندا ەلوردانىڭ نۇرا اۋدانىندا ورنالاسقان، ەركىن ماقساتتاعى جەكە عيماراتتىڭ ساتىلاتىنى كورسەتىلگەن. جالپى اۋماعى شامامەن 15,8 مىڭ شارشى مەتردى قۇرايدى، ونىڭ ىشىندە 800 شارشى مەترى پاركينگكە ارنالعان. سونداي-اق نىسان ماڭىندا اشىق اۆتوتۇراق بار ەكەنى جانە اۋماقتى قورشاۋعا مۇمكىندىك قاراستىرىلعانى ايتىلعان. باعاسى 17,5 ملرد تەڭگە دەپ كورسەتىلگەن.
الايدا كوپ ۇزاماي بۇل حابارلاندىرۋ سايتتان الىنىپ تاستالدى.
ساۋدا ورتالىعىنىڭ ساتىلۋىنا قاتىستى تاراعان اقپارات ءالى تەكسەرىلىپ جاتىر.
ايتا كەتەيىك، «حان شاتىر» – استانانىڭ ساۋلەتتىك سيمۆولدارىنىڭ ءبىرى. نىساننىڭ جوباسىن ايگىلى بريتاندىق ساۋلەتشى نورمان فوستەر جەتەكشىلىك ەتەتىن ارحيتەكتۋرالىق بيۋرو ازىرلەگەن. عيمارات ەرەكشە شاتىر پىشىنىندە سالىنعان، ال ونىڭ بيىكتىگى شپيلىمەن قوسا ەسەپتەگەندە شامامەن 150 مەترگە جەتەدى. ساۋدا-ويىن-ساۋىق ورتالىعى 2010 جىلى پايدالانۋعا بەرىلگەن. ول الەمدەگى ەڭ ءىرى شاتىرلى قۇرىلىستاردىڭ ءبىرى سانالادى جانە حالىقارالىق رەيتينگتەرگە ەنىپ، گيننەستىڭ رەكوردتار كىتابىنا تىركەلگەن.
