استانادا تولىق ىسكە قوسىلماعان جەڭىل رەلستى كولىك جۇيەسىنىڭ تىرەكتەرىندەگى بوياۋدىڭ كەتە باستاعانى تۋرالى اقپارات تارادى، دەپ حابارلايدى "ادىرنا" ۇلتتىق پورتالى.
الەۋمەتتىك جەلىلەردە ءشامشى قالداياقوۆ كوشەسى بويىنداعى جول وتكەلدەرىنىڭ تىرەكتەرى مەن ارقالىقتارىنان بوياۋدىڭ قابىرشاقتانىپ ءتۇسىپ جاتقانى تۇسىرىلگەن ۆيدەو تارادى.
جەلى قولدانۋشىلارى نىساننىڭ ساپاسىنا قاتىستى ءتۇرلى پىكىر ءبىلدىرىپ، قۇرىلىس بارىسىنا الاڭداۋشىلىق تانىتتى.
بەتون تىرەكتەردى بوياۋ جۇمىستارى 2025 جىلدىڭ مامىر ايىندا باستالعان ەدى. City Transportation Systems كومپانياسىنىڭ ءباسپاسوز قىزمەتى تۇسىنىكتەمە بەردى.
"تىرەكتەر مەن جول وتكەلىنىڭ ەلەمەنتتەرىن بوياۋ جۇمىستارى قىس مەزگىلىندە ۋاقىتشا توقتاتىلدى. اۋا رايى جىلىعاننان كەيىن جۇمىستار قايتا جالعاسىپ، تولىق اياقتالادى", – دەلىنگەن حابارلامادا.
