باتىس قازاقستان وبلىسى قازتالوۆ اۋدانىنداعى سارىوزەن وزەنىنەن اقبوكەندەردىڭ ولەكسەلەرى تابىلدى. بۇل “جەتىنشى” تەلەارناعا جاريالادى، دەپ حابارلايدى “ادىرنا”.
مامانداردىڭ ايتۋىنشا، قىسقى كوشى-قوننان كەيىن السىرەگەن اقبوكەندەردىڭ قىرىلۋى تابيعي قۇبىلىس.
قازىر ماماندار جانۋارلاردىڭ ولەكسەلەرىن جيناپ، جويۋ جۇمىستارىن جۇرگىزىپ جاتىر. ازىرگە 1600-دەن استام ولەكسە انىقتالعان. مۇنداي جاعداي كوكتەم مەزگىلى كەلگەن سايىن جىل سايىن بايقالادى. كەيبىر جىلدارى ولاردىڭ سانى 5 مىڭنان دا اسىپ كەتكەن.
"جانۋارلاردىڭ ناقتى نەدەن قىرىلعانى جانە ولاردىڭ ادامدارعا قاۋىپ توندىرە مە، جوق پا قازىر انىقتالىپ جاتىر. ءتيىستى سىنامالار الىنىپ، ۆەتەريناريالىق زەرتحاناعا جىبەرىلدى. جالپى، وتكەن جىلدىڭ قورىتىندىسى بويىنشا، ورال پوپۋلياتسياسىنداعى اقبوكەندەردىڭ سانى 2 ميلليون 300 مىڭعا جەتكەن. جاقىن ارادا ولاردىڭ ناقتى سانى بەلگىلى بولادى. كەلەسى اپتادا وڭىردە جانۋارلاردى ەسەپكە الۋ جوسپارلانعان", – دەلىنگەن حابارلامادا.
ەسكە سالساق، 2025 جىلى ۇكىمەت قاۋلىسىمەن اقبوكەندەردىڭ سانىن رەتتەۋ جۇمىستارى جۇرگىزىلگەن.
جانۋارلار دۇنيەسى اۋماقتىق ينسپەكتسياسى باسشىسىنىڭ ورىنباسارى قايرات كادەشەۆتىڭ ايتۋىنشا، اقبوكەندەردىڭ سانىن رەتتەۋ ناتيجەسىندە تابيعي ورتادان 108 مىڭنان استام جانۋار الىنعان.
