سەمەي قالاسىنداعى بيولوگيالىق ورتالىقتا كەلەڭسىز وقيعا ورىن الدى. كەلۋشىلەردىڭ ارىستاندارعا تاس لاقتىرعان ءساتى ۆيدەوعا ءتۇسىپ، الەۋمەتتىك جەلىلەردە تارادى. بۇل تۋرالى “ادىرنا” حابارلادى.
بيولوگيالىق ورتالىق وكىلدەرىنىڭ مالىمدەۋىنشە، مۇنداي جاعدايلار سوڭعى ۋاقىتتا جيىلەپ كەتكەن. اسىرەسە، ەرەسەك ادامداردىڭ جانۋارلارعا تاس، تاياق جانە وزگە دە زاتتاردى لاقتىرۋى الاڭداۋشىلىق تۋدىرىپ وتىر. ماماندار مۇنداي ارەكەتتەردى جاي ەرمەك ەمەس، جانۋارلارعا جاسالعان قاتىگەزدىك رەتىندە باعالايدى.
“كەلۋشىلەردىڭ مۇنداي ارەكەتى جانۋارلاردىڭ دەنساۋلىعىنا زيان كەلتىرەدى. بۇل – تەك ءتارتىپ بۇزۋشىلىق قانا ەمەس، تىرشىلىك يەلەرىنە جاسالعان قاتىگەزدىك”، – دەلىنگەن ورتالىق حابارلاماسىندا.
وقيعاعا بايلانىستى پوليتسيا دەپارتامەنتى تەكسەرۋ جۇمىستارىن باستاعانىن حابارلادى.
قازىرگى تاڭدا بەينەباقىلاۋ كامەرالارىنىڭ جازبالارى زەردەلەنىپ، كۋاگەرلەر انىقتالىپ، جاۋاپ الىنۋدا. قۇزىرلى ورگاندار وقيعاعا قاتىسى بار تۇلعالاردى انىقتاعاننان كەيىن، ولاردىڭ ارەكەتتەرىنە قازاقستان رەسپۋبليكاسىنىڭ قولدانىستاعى زاڭناماسىنا سايكەس قۇقىقتىق باعا بەرىپ، ءتيىستى شەشىم قابىلدايتىنىن مالىمدەدى.
ماماندار تۇرعىنداردى جانۋارلارعا جاۋاپكەرشىلىكپەن قاراۋعا شاقىرىپ، مۇنداي ارەكەتتەردىڭ زاڭ الدىندا جاۋاپكەرشىلىككە اكەلۋى مۇمكىن ەكەنىن ەسكەرتتى.
