ءماجىلىس دەپۋتاتى باقىتجان بازاربەك سوت پروتسەستەرى مەن سۋ قويمالارىن مەملەكەتتىك مەنشىككە قايتارۋ ماسەلەسىنە باقىلاۋدى كۇشەيتۋ قاجەتتىگىن مالىمدەدى، دەپ حابارلايدى «ادىرنا» ءتىلشىسى.
ونىڭ ايتۋىنشا، كونستيتۋتسيادا تابيعي رەسۋرستار حالىققا تيەسىلى دەگەن قاعيدا بەكىتىلگەنىنە قاراماستان، ءىس جۇزىندە سۋ قورىنىڭ ءبىر بولىگى جەكەمەنشىككە ءوتىپ كەتكەن. مىسال رەتىندە ول الماتى وبلىسىنداعى جاعدايدى كەلتىردى. ماجىلىسمەننىڭ ايتۋىنشا، بىرقاتار ىستەر بويىنشا سوتتار مەملەكەتتىڭ ۇستانىمىن قولداپ، سۋ نىساندارىن بەرۋ تۋرالى كەلىسىمدەردى زاڭسىز دەپ تانىپ جاتىر. الايدا ۇقساس جاعدايلاردا قاراما-قارسى شەشىمدەر دە شىعارىلۋدا، بۇل سوت تاجىريبەسىنىڭ بىرىزدىلىگىنە قاتىستى سۇراق تۋعىزادى.
«بولات نازارباەۆتىڭ كەزىندە جانە ونىڭ كومەگىمەن ءبىر ادامنىڭ قولىنا زاڭسىز وتكەن الماتى وبلىسىنداعى ءتورت ءىرى سۋ قويماسى مەملەكەت مەنشىگىنە قايتارىلدى»،- دەدى بازاربەك.
سونىمەن قاتار دەپۋتات قاپشاعاي سۋ قويماسىنىڭ سۋ قورعاۋ ايماقتارىنداعى جەرلەرگە قاتىستى ىستەر بويىنشا سوت تاجىريبەسى ءالى دە قايشىلىقتى ەكەنىن اتاپ ءوتتى. كەيبىر جاعدايلاردا سوتتار زاڭ بۇزۋشىلىقتاردى مويىنداسا، ەندى بىرىندە مەملەكەتتىك ورگانداردىڭ تالاپ-ارىزدارىن قاناعاتتاندىرۋدان باس تارتادى.
بازاربەك جەر جانە سۋ كودەكستەرىنە سايكەس مۇنداي اۋماقتار جەكەمەنشىككە بەرىلمەۋى ءتيىس ەكەنىن، ولار بويىنشا شەشىمدەر دە ءبىرىزدى بولۋى قاجەت ەكەنىن ەسكە سالدى.
«زاڭ بارىنە ورتاق، وليگارحتارعا ارنالعان ەرەكشە ادىلدىك بولماۋى كەرەك»، — دەپ اتاپ ءوتتى ول.
وسىعان بايلانىستى دەپۋتات باس پروكۋروردان ىلە وزەنى مەن قاپشاعاي سۋ قويماسىنا قاتىستى سۋ قورى جەرلەرىن قايتارۋ ىستەرىن ەرەكشە باقىلاۋعا الۋدى سۇرادى. سونداي-اق ول 65 جەر ۋچاسكەسىنە قاتىستى مامىلەلەردى جارامسىز دەپ تانۋ جانە مەنشىك قۇقىقتارىن جويۋ ءۇشىن قوسىمشا تالاپ-ارىزدار بەرۋدى ۇسىندى.
بۇعان دەيىن الماتىدا 17 ملرد تەڭگە كولەمىندەگى جەر تەلىمدەرى مەملەكەتتىك مەنشىككە قايتارىلعان ەدى.
