سانكت-پەتەربۋرگتەگى ماسكەۋ ۆوكزالىندا بەت-الپەتتى تانۋ جۇيەسى «سۆوبودا ۆاجنەە مودى» روك-توبىنىڭ ۆوكاليسى دميتري گاليامينسكيحتى ۋكراينالىق جۋرناليست دميتري گوردونمەن شاتاستىرىپ العان. بۇل تۋرالى ءانشى جەلىدەگى پاراقشاسىندا جازدى، دەپ حابارلايدى «ادىرنا» ءتىلشىسى.
«بىرەۋ ارتىمنان جۇگىرىپ كەلە جاتقانىن سەزدىم. «مەنى تانىعان شىعار، اۆتوگراف نەمەسە بىرگە سۋرەتكە ءتۇسۋدى سۇرايتىن بولار» دەپ ويلادىم. ارتىما قاراسام، پوليتسەيلەر جۇگىرىپ كەلە جاتقانىن كوردىم. ولار مەنى بىردەن ۇستاپ الدى. بەت-الپەتتى تانۋ جۇيەسى مەنى “جۋرناليست-تەرروريست” دميتري گوردون دەپ تانىعان»، — دەپ جازدى ول.
ۆوكاليستىڭ ايتۋىنشا، پوليتسەيلەردىڭ ءبىرى ونى شىنىمەن گوردون دەپ ويلاپ، «جاسىرىنىپ جۇرگەن-جۇرمەگەنىن تەكسەرۋ ءۇشىن ساقالى مەن شاشىن ۇستاپ كورگەن».
دميتري گوردون — كيەۆ قالاسىنىڭ تۋماسى. ول ءارتۇرلى ۋكراين باسىلىمدارىندا جۇمىس ىستەپ، 1996 جىلدان باستاپ «ۆ گوستياح ۋ دميتريا گوردونا» تەلەباعدارلاماسىن جۇرگىزگەن. باعدارلاماعا ءتۇرلى تانىمال تۇلعالاردى شاقىرعان. 2010 جىلى «گوردون» ينتەرنەت-جوباسىن قۇرىپ، كيەۆ قالالىق كەڭەسىنە دەپۋتات بولىپ سايلانعان. ءار جىلدارى ونىڭ باعدارلاماسىنا الەكساندر لۋكاشەنكو، ميحايل سااكاشۆيلي، ۆلاديمير زەلەنسكي، يگور كولومويسكي، يرينا رودنينا، يوسيف كوبزون قاتىسقان.
2022 جىلدىڭ قىركۇيەگىندە رەسەي ادىلەت مينيسترلىگى گوردوندى شەتەل اگەنتتەرى تىزىمىنە ەنگىزدى، سول جىلى ۋكراينالىق جۋرناليست حالىقارالىق ىزدەۋگە جاريالاندى. وعان قاتىستى بىرنەشە قىلمىستىق ءىس قوزعالعان. 2024 جىلدىڭ كۇزىندە ەكىنشى باتىس وكرۋگتىك اسكەري سوتى ونى تەرروريزمگە شاقىرۋ جانە اسكەر تۋرالى جالعان اقپارات تاراتۋ ءىسى بويىنشا سىرتتاي 14 جىلعا باس بوستاندىعىنان ايىرۋعا ۇكىم شىعاردى.
