تالدىقورعاندا 23 جاستاعى سپورتشى ايان تۇردىبەكتىڭ قازاسىنا بايلانىستى ءمان-جايلار تەكسەرىلىپ جاتىر، دەپ حابارلايدى “ادىرنا”.
مارقۇمنىڭ قۇربىسى گۇلىم بەكتۇرعانوۆانىڭ ايتۋىنشا، ايان العاش ءوزىن جايسىز سەزىنگەن كەزدە جەدەل جاردەم شاقىرىلعان. كەلگەن دارىگەرلەر ونى قاراپ، تاماعى قابىنعانىن انىقتاپ، دەنە قىزۋىن تۇسىرەتىن ءدارى قابىلداۋعا كەڭەس بەرىپ، كەتىپ قالعان.
الايدا ءبىراز ۋاقىتتان كەيىن بويجەتكەننىڭ جاعدايى كۇرت ناشارلاعان. جاقىندارى ونى وزدەرى اۋرۋحاناعا اپارعانىمەن، تۋىستارىنىڭ سوزىنشە، كوپبەيىندى اۋرۋحانا قابىلداۋدان باس تارتىپ، وبلىستىق اۋرۋحاناعا جىبەرگەن.
وبلىستىق اۋرۋحانادا ناۋقاستىڭ جاعدايى ينفەكتسيالىق دەپ باعالانىپ، ينفەكتسيالىق اۋرۋحاناعا باعىتتالعان. ول جەردە ايانعا ەكى رەت تامشىلاتقىش قويىلعان. باستاپقىدا جاعدايى جاقسارعانداي بولعانىمەن، كەيىن ءوڭى بوزارىپ، ەرىندەرى كوگەرە باستاعان.
"كەيىنىرەك ناۋقاس وبلىستىق ينفەكتسيالىق اۋرۋحاناعا ءوز بەتىمەن جۇگىنگەن، وندا وعان قاجەتتى مەديتسينالىق كومەك كورسەتىلىپ، ستاتسيونارعا جاتۋ ۇسىنىلعان. الايدا ول ەمدەلۋدەن باس تارتىپ، ءتيىستى قۇجاتقا قول قويعان", - دەدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى الماگۇل كەنجەعۇلوۆ
قۇربىسىنىڭ ايتۋىنشا، ايان اۋرۋحانادا قالۋدان باس تارتىپ، ءوز ەركىمەن جازباشا تۇردە باس تارتۋ قۇجاتىن تولتىرعان. الايدا سول ءتۇنى ونىڭ جاعدايى قايتادان كۇرت ناشارلاپ، جەدەل جاردەم قايتا شاقىرىلعان. دارىگەرلەر ونى وبلىستىق اۋرۋحاناعا جەتكىزگەنىمەن، ول ەسىن جيماستان كوز جۇمعان.
تۋىستارى مەديتسينالىق كومەكتىڭ دەر كەزىندە كورسەتىلمەگەنىن ايتىپ، دارىگەرلەردىڭ سالعىرتتىعى بولۋى مۇمكىن ەكەنىن العا تارتادى. سونىمەن قاتار، ءولىم قورىتىندىسىندا «بەلگىسىز زاتتان ۋلانۋ» دەگەن بولجام كورسەتىلگەنىن مالىمدەگەن.
ءوز كەزەگىندە جەتىسۋ وبلىستىق دەنساۋلىق ساقتاۋ باسقارماسى 9 ءساۋىر كۇنى ساعات 18:16-دا ايان تۇردىبەككە الدىن الا ء«جىتى رەسپيراتورلىق ۆيرۋستىق ينفەكتسيا» دياگنوزى قويىلىپ، ءتيىستى ەم تاعايىندالعانىن حابارلادى.
ۆەدومستۆونىڭ مالىمەتىنشە، كەيىن ول ءوز بەتىنشە وبلىستىق ينفەكتسيالىق اۋرۋحاناعا جۇگىنىپ، قاجەتتى مەديتسينالىق كومەك العان. دارىگەرلەر ستاتسيونارلىق ەم ۇسىنعانىمەن، ناۋقاس ودان باس تارتىپ، ءتيىستى قۇجاتقا قول قويعان.
سونداي-اق تۇنگى ساعات 03:49-دا جەدەل جاردەمگە قايتا شاقىرتۋ تۇسكەن. دارىگەرلەر شۇعىل كومەك كورسەتىپ، ناۋقاستى وبلىستىق اۋرۋحاناعا جەتكىزگەنىمەن، ونىڭ ءومىرىن ساقتاپ قالۋ مۇمكىن بولماعان.
قازىرگى ۋاقىتتا پوليتسيا اتالعان فاكتى بويىنشا سوتقا دەيىنگى تەرگەۋ جۇرگىزىپ جاتىر. سوت-مەديتسينالىق ساراپتاما تاعايىندالعان.
ايتا كەتەيىك، ايان تۇردىبەك كوزى تىرىسىندە كۇرەسپەن اينالىسىپ، سامبودان ايماقتىق جارىستاردا ونەر كورسەتكەن.
