Taldyqorǧanda 23 jastaǧy sportşy Aian Tūrdybektıŋ qazasyna bailanysty män-jailar tekserılıp jatyr, dep habarlaidy “Adyrna”.
Marqūmnyŋ qūrbysy Gülım Bektūrǧanovanyŋ aituynşa, Aian alǧaş özın jaisyz sezıngen kezde jedel järdem şaqyrylǧan. Kelgen därıgerler ony qarap, tamaǧy qabynǧanyn anyqtap, dene qyzuyn tüsıretın därı qabyldauǧa keŋes berıp, ketıp qalǧan.
Alaida bıraz uaqyttan keiın boijetkennıŋ jaǧdaiy kürt naşarlaǧan. Jaqyndary ony özderı auruhanaǧa aparǧanymen, tuystarynyŋ sözınşe, köpbeiındı auruhana qabyldaudan bas tartyp, oblystyq auruhanaǧa jıbergen.
Oblystyq auruhanada nauqastyŋ jaǧdaiy infeksiialyq dep baǧalanyp, infeksiialyq auruhanaǧa baǧyttalǧan. Ol jerde Aianǧa ekı ret tamşylatqyş qoiylǧan. Bastapqyda jaǧdaiy jaqsarǧandai bolǧanymen, keiın öŋı bozaryp, erınderı kögere bastaǧan.
"Keiınırek nauqas oblystyq infeksiialyq auruhanaǧa öz betımen jügıngen, onda oǧan qajettı medisinalyq kömek körsetılıp, stasionarǧa jatu ūsynylǧan. Alaida ol emdeluden bas tartyp, tiıstı qūjatqa qol qoiǧan", - dedı oblystyq densaulyq saqtau basqarmasy basşysynyŋ orynbasary Almagül Kenjeǧūlov
Qūrbysynyŋ aituynşa, Aian auruhanada qaludan bas tartyp, öz erkımen jazbaşa türde bas tartu qūjatyn toltyrǧan. Alaida sol tünı onyŋ jaǧdaiy qaitadan kürt naşarlap, jedel järdem qaita şaqyrylǧan. Därıgerler ony oblystyq auruhanaǧa jetkızgenımen, ol esın jimastan köz jūmǧan.
Tuystary medisinalyq kömektıŋ der kezınde körsetılmegenın aityp, därıgerlerdıŋ salǧyrttyǧy boluy mümkın ekenın alǧa tartady. Sonymen qatar, ölım qorytyndysynda «belgısız zattan ulanu» degen boljam körsetılgenın mälımdegen.
Öz kezegınde Jetısu oblystyq densaulyq saqtau basqarmasy 9 säuır künı saǧat 18:16-da Aian Tūrdybekke aldyn ala «jıtı respiratorlyq virustyq infeksiia» diagnozy qoiylyp, tiıstı em taǧaiyndalǧanyn habarlady.
Vedomstvonyŋ mälımetınşe, keiın ol öz betınşe oblystyq infeksiialyq auruhanaǧa jügınıp, qajettı medisinalyq kömek alǧan. Därıgerler stasionarlyq em ūsynǧanymen, nauqas odan bas tartyp, tiıstı qūjatqa qol qoiǧan.
Sondai-aq tüngı saǧat 03:49-da jedel järdemge qaita şaqyrtu tüsken. Därıgerler şūǧyl kömek körsetıp, nauqasty oblystyq auruhanaǧa jetkızgenımen, onyŋ ömırın saqtap qalu mümkın bolmaǧan.
Qazırgı uaqytta polisiia atalǧan faktı boiynşa sotqa deiıngı tergeu jürgızıp jatyr. Sot-medisinalyq saraptama taǧaiyndalǧan.
Aita keteiık, Aian Tūrdybek közı tırısınde kürespen ainalysyp, sambodan aimaqtyq jarystarda öner körsetken.
