يران اقش-پەن يسلامابادتا وتەتىن كەلىسسوزدەردىڭ ەكىنشى كەزەڭىنە قاتىسپايتىنىن مالىمدەدى، دەپ حابارلايدى «ادىرنا» ءتىلشىسى IRNA اگەنتتىگىنە سىلتەمە جاساپ.
تەگەران بۇل شەشىمىن ۆاشينگتوننىڭ شامادان تىس تالاپتارى، سونداي-اق اقش-تىڭ ورمۇز بۇعازىن بۇعاتتاۋدى جالعاستىرۋىمەن ءتۇسىندىردى. يران مۇنى اتىستى توقتاتۋ رەجيمىن بۇزۋ دەپ باعالاپ وتىر.
امەريكالىق دەلەگاتسيانىڭ يرانمەن بايلانىس ورناتۋ ءۇشىن يسلاماباد قالاسىنا اتتانعانىن 19 ساۋىردە دونالد ترامپ مالىمدەگەن ەدى. ونىڭ ايتۋىنشا، كەزدەسۋ 20 ساۋىرگە جوسپارلانعان. اق ءۇي باسشىسى كەلىسىمگە قول جەتكىزىلەدى دەگەن ءۇمىتى بار ەكەنىن ايتىپ، سونىمەن بىرگە تەگەراندى ء«بىتىمدى بۇزدى» دەپ ايىپتادى. ول يسلام رەسپۋبليكاسى كەلىسىمگە كەلمەسە، بارلىق ەلەكتر ستانتسياسى مەن كوپىرلەردى جوياتىنىن مالىمدەپ، قوقان-لوقى جاسادى.
8 ساۋىردە اقش پەن يران ەكى اپتاعا اتىستى توقتاتۋ تۋرالى جاريالاعان بولاتىن. كەلىسسوزدەردىڭ العاشقى كەزەڭى وتكەن دەمالىس كۇندەرى يسلامابادتا ءوتىپ، ناتيجەسىز اياقتالدى.
سوعان قاراماستان، 17 ساۋىردە تەگەران ءبىتىم مەرزىمى اياقتالعانعا دەيىن بارلىق كوممەرتسيالىق كەمەگە ورمۇز بۇعازى ارقىلى وتۋگە رۇقسات بەردى. بۇل ليۆانداعى اتىستى توقتاتۋ تۋرالى كەلىسىم اياسىندا جۇزەگە استى. ال ترامپ تاراپتار كەلىسىمگە كەلمەيىنشە، يران پورتتارىنا قويىلعان بلوكادانى الىپ تاستاۋدان باس تارتتى. بۇعان جاۋاپ رەتىندە يسلام رەۆوليۋتسياسى ساقشىلار كورپۋسى بۇعازدى جاباتىنىن مالىمدەپ، وعان جاقىنداۋعا تىرىسقان كەز كەلگەن كەمەگە سوققى بەرەتىنىن ەسكەرتتى.
