اتىراۋ وبلىسى، جانگەلدين اۋىلىنداعى ءبىر وتباسىنىڭ ولىمىنە كۇدىكتى سۇلتان سارسەماليەۆ اقىل-ەسى ساۋ دەپ تانىلدى. بۇل تۋرالى اتىراۋ وبلىستىق پروكۋراتۋراسى مالىمدەدى، دەپ حابارلايدى "ادىرنا".
سوت-پسيحاتريالىق ساراپتاماسى سارسەماليەۆ ءوز ارەكەتىنە جاۋاپ بەرەتىنىن، ونىڭ قىلمىستىق جاۋاپكەرشىلىگى بولاتىنىن بىلگەن دەگەن قورىتىندى شىعاردى. ال ونىڭ جۇبايى اقبايان ءالى دە الماتىدا سوت-پسيحياتريكالىق ساراپتامادان ءوتىپ جاتىر. اتىراۋداعى جەرگىلىكتى دارىگەرلەر ونىڭ تۋىستارىنىڭ ولىمىنە قانشالىقتى قاتىسى بار ەكەنىن انىقتاي الماعان.
ازىرگە اقبايان كۇدىكتى. الماتى ماماندارىنىڭ قورىتىندىسى شىققاننان كەيىن عانا ونىڭ ستاتۋسىن وزگەرتۋ ماسەلە شەشىلەدى.
پروكۋراتۋرا مالىمەتىنشە، قىلمىسقا باسقا تۇلعالاردىڭ قاتىسى بولماعان.
تەرگەۋ مالىمەتىنشە، جانگەلديندە اراعا جارتى جىل سالىپ، ەكى رەت قىلمىس جاسالعان. الدىمەن مامىردا وتباسىنىڭ كىشى ۇلى ناۋرىز ولتىرىلگەن. ال كەيىنىرەك قاراشادا ونىڭ اكە-شەشەسى مەن اپكەسى اجال قۇشقان.
اتىراۋ وبلىسى پروكۋرورىنىڭ كومەكشىسى جاندار بولاتبەكتىڭ مالىمدەۋىنشە، قازا تاپقانداردىڭ دەنەسىندە اس ءۇي پىشاعىمەن سالىنعان، شانشىعان، كەسكىلەگەن جاراقاتتار انىقتالعان.
«ارقايسىسىنىڭ كەۋدە تۇسىنا، مويىن ايماعىنا جانە ومىرلىك ماڭىزدى مۇشەلەرىنە التى جانە ودان دا كوپ زاقىم كەلگەن»،- دەپ ناقتىلادى ول.
ەسكە سالساق، بيىل قىستا اتىراۋدا جوعالعان وتباسىنىڭ وقيعاسى كوپشىلىكتى ءدۇر سىلكىندىردى. اكە-شەشەسى مەن ەكى بالاسى ۇشتى-كۇيلى جوعالىپ كەتتى. كەيىنىرەك ەرلى-زايىپتى ماكسوت قارابالين مەن ءناسىپ وتەشقاليەۆانىڭ سۇيەگى وزدەرى تۇرعان ءۇي اۋماعىنان تابىلعان بولاتىن. ال ۇلى مەن قىزى ناۋرىز بەن ميرامگۇلدىڭ دەنەسىن اتىراۋ قالاسىنىڭ ماڭىنداعى گەولوگ ىقشاماۋدانىندا تىعىپ تاستاعان جەرىنەن انىقتالعان.ء تورت ادامنىڭ ولىمىنە وتباسىنىڭ كۇيەۋبالاسى سۇلتان سارسەماليەۆ كۇدىكتى رەتىندە تانىلدى.
