الماتى قالاسىندا ەۋرازيا مادەنيەتتەرىن جاقىنداستىرۋعا ارنالعان VII حالىقارالىق ء«وز جەرىنىڭ ەلشىسى» فورۋمى ۇيىمداستىرىلادى، دەپ حابارلايدى "ادىرنا" ۇلتتىق پورتالى.
اتالعان شارا ولجاس سۇلەيمەنوۆتىڭ 90 جىلدىق مەرەيتويىنا ارنالادى.
فورۋمدى مادەنيەتتەردى جاقىنداستىرۋ حالىقارالىق ورتالىعى يۋنەسكو اياسىندا، بولات وتەمۇراتوۆ قورىنىڭ قولداۋىمەن وتكىزەدى. فورۋم 26 مامىرعا جوسپارلانعان.
بيىل قازاقستاندا جانە الەمنىڭ وقىرمان قاۋىمىندا كورنەكتى اقىن، ويشىل، لينگۆيست-عالىم، سونداي-اق «نەۆادا–سەمەي» انتيادرولىق قوزعالىسىنىڭ نەگىزىن قالاۋشى ولجاس سۇلەيمەنوۆتىڭ 90 جىلدىق مەرەيتويى كەڭىنەن اتاپ وتىلۋدە.
ونىڭ 1960-جىلداردان باستالعان ادەبي جانە عىلىمي قىزمەتى قازاق جانە تۇركى حالىقتارىنىڭ ۇلتتىق ساناسىنىڭ جاڭاشا قالىپتاسۋىنا ىقپال ەتتى. ال 1989 جىلى قۇرىلعان «نەۆادا–سەمەي» قوزعالىسى قوعامدى بىرىكتىرىپ، يادرولىق سىناقتاردىڭ زاردابىن ەڭسەرۋگە جول اشتى.
فورۋمنىڭ ماقساتى – ولجاس سۇلەيمەنوۆتىڭ ادەبي، عىلىمي جانە فيلوسوفيالىق مۇراسىن جان-جاقتى زەردەلەۋ جانە ونى قازىرگى مادەني ءارى ءبىلىم بەرۋ ۇدەرىستەرىنە ەنگىزۋ جولدارىن قاراستىرۋ.
