ءماجىلىس دەپۋتاتى باقىتجان بازاربەك جوعارى وقۋ ورىندارىندا بيۋدجەت قاراجاتىنىڭ ءتيىمسىز جۇمسالۋى مەن اككرەديتاتسيا جۇيەسىندەگى ولقىلىقتارعا قاتىستى بىرقاتار سىن ايتتى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
دەپۋتاتتىڭ ايتۋىنشا، ءبىلىم بەرۋ سالاسىندا مەملەكەتتىك دەرەكتەر بازالارى مەن اقپاراتتىق جۇيەلەر اراسىندا تولىققاندى ينتەگراتسيا جوق. سونىڭ سالدارىنان مەملەكەت ستۋدەنتتەردىڭ قوزعالىسىن، گرانتتاردىڭ ءبولىنۋىن جانە قارجىنىڭ جۇمسالۋىن ناقتى باقىلاۋدا ۇستاي الماي وتىر.
ونىڭ سوزىنشە، بۇل جاعداي قوسارلانعان قارجىلاندىرۋعا، وقۋدان شىعارىلعان ستۋدەنتتەرگە تولەمدەردىڭ جالعاسۋىنا جانە وزگە دە زاڭسىز سحەمالاردىڭ پايدا بولۋىنا اكەلۋى مۇمكىن. جالپى قارجىلىق زاڭبۇزۋشىلىق كولەمى 4,4 ملرد تەڭگەنى، ءتيىمسىز پايدالانىلعان قاراجات 12,6 ملرد تەڭگەنى، ال بيۋدجەت شىعىندارى مەن جىبەرىلگەن پايدا 1,5 ملرد تەڭگەنى قۇراعان. سونىمەن قاتار، 30,3 ملرد تەڭگە كولەمىندەگى قاراجات ءتيىمسىز جۇمسالعانى ايتىلدى.
بۇدان بولەك، دەپۋتات استانالىق ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى سياقتى جوعارى وقۋ ورىندارىن اككرەديتاتسيالاۋ جۇيەسى دە سىنعا الىندى. دەپۋتاتتىڭ پىكىرىنشە، ءبىلىم ساپاسىن باعالاۋعا ءتيىس بۇل جۇيە كەي جاعدايدا فورمالدى سيپات الىپ، تاۋەلسىزدىك قاعيداتتارىنا ساي جۇمىس ىستەمەيدى. باقىتجان بازاربەك ناقتى مىسال رەتىندە اككرەديتاتسيا جۇرگىزەتىن ۇيىمدار مەن ۋنيۆەرسيتەتتەر اراسىنداعى ىقتيمال مۇددەلەر قاقتىعىسىن اتادى. ونىڭ سوزىنشە، كەيبىر جاعدايلاردا اككرەديتاتسيالىق اگەنتتىكتەردىڭ قۇرامىندا ۋنيۆەرسيتەت باسشىلىعىنا جاقىن تۇلعالار بولۋى مۇمكىن، بۇل باعالاۋ وبەكتيۆتىلىگىنە كۇمان تۋدىرادى.
