قازاقستاندا تيمۋر قۇلىباەۆتىڭ Halyk قايىرىمدىلىق قورى مەن ەكولوگيا جانە تابيعي رەسۋرستار مينيسترلىگى بىرلەسىپ جۇزەگە اسىرىپ جاتقان «Halyk ورمانى» ەكولوگيالىق باستاماسى اياسىندا ميلليونىنشى كوشەت ەگىلدى.
بۇل – ەلىمىزدەگى كەيىنگى جىلدارداعى ەڭ اۋقىمدى ەكولوگيالىق جەتىستىكتەردىڭ ءبىرى. ايتۋلى وقيعا 2026 جىلعى 25 ساۋىردە، مەملەكەت باسشىسى قاسىم-جومارت توقاەۆتىڭ ۇلتتىق ەكولوگيالىق كۇن ءتارتىبىن قولداۋ ماقساتىندا باستاماشى بولعان جالپىۇلتتىق اعاش ەگۋ كۇنى اياسىندا ءوتتى. مەرەيلى كوشەتتى استانانىڭ جاسىل بەلدەۋىندە Astana IT University ستۋدەنتى وتىرعىزدى.
ءبىر ميلليون كوشەت مەجەسىنە جەتكەن جوبا 2026 جىلعى 22 ساۋىردە استانادا وتكەن RES 2026 EXPO الاڭىندا حالىقارالىق دەڭگەيدە دە مويىندالدى. «تۇراقتى دامۋ جونىندەگى كۇن ءتارتىبىنىڭ كوشباسشىلارى – قالالار مەن كومپانيالار» پانەلدىك سەسسياسىندا تيمۋر قۇلىباەۆتىڭ Halyk قايىرىمدىلىق قورى مەن ەكولوگيا جانە تابيعي رەسۋرستار مينيسترلىگىنىڭ بىرلەسكەن باستاماسى ورمان ەكوجۇيەسىن قالپىنا كەلتىرۋگە باعىتتالعان جۇيەلى جۇمىستىڭ، سونداي-اق، مەملەكەت، كاسىپ جانە قوعام اراسىنداعى ءتيىمدى ارىپتەستىكتىڭ ۇلگىسى رەتىندە اتاپ ءوتىلدى.
ءسامميتتىڭ ىسكەرلىك باعدارلاماسىمەن قاتار، جوبا ناقتى ىسكە اسىرىلۋىن جالعاستىردى. بيىل «Halyk ورمانى» جوباسىنىڭ كوكتەمگى وتىرعىزۋ ماۋسىمى استانانىڭ جاسىل بەلدەۋىندە باستالدى. سونداي-اق كوشەتتەر «سەمەي ورمانى» مەملەكەتتىك ورمان تابيعي رەزەرۆاتى مەن ىلە-الاتاۋ مەملەكەتتىك ۇلتتىق تابيعي پاركىنىڭ اۋماعىندا دا وتىرعىزىلدى.
تيمۋر قۇلىباەۆتىڭ Halyk قايىرىمدىلىق قورى باستاماشى بولعان «Halyk ورمانى» جوباسى قازاقستاننىڭ ورمان قورىن قالپىنا كەلتىرۋگە باعىتتالعان ەڭ ءىرى ەكولوگيالىق باستامالاردىڭ بىرىنە اينالدى. جوبا ىسكە قوسىلعان ساتتەن باستاپ ەلدىڭ ءۇش وڭىرىندە 240 گەكتار اۋماققا 800 مىڭنان اسا كوشەت ەگىلدى. ال كوكتەمگى ماۋسىم قورىتىندىسى بويىنشا بۇل كورسەتكىش ءبىر ميلليوننان استى.
«Halyk ورمانى» قازاقستانداعى ەكولوگيالىق باستامالاردىڭ جاڭا ۇلگىسىن قالىپتاستىرىپ وتىر. ياعني جوبا ءبىر رەتتىك اكتسيامەن شەكتەلمەي، ناقتى ناتيجەسى ولشەنەتىن جۇيەلى ءارى ۇزاق مەرزىمدى جۇمىسقا نەگىزدەلگەن.
بۇل جۇمىستار Halyk قايىرىمدىلىق قورىنىڭ كەڭ اۋقىمدى ەكولوگيالىق باعىتىنىڭ ءبىر بولىگى سانالادى. قوردىڭ بۇل سالاداعى جۇمىسى ءۇش نەگىزگى ۇستانىمعا نەگىزدەلگەن: ءومىر ساپاسىن ارتتىرۋ، تازا اۋا جانە تۇراقتى دامۋ. باستى ماقسات – ادامدارعا جايلى ورتادا ءومىر سۇرۋىنە مۇمكىندىك جاساۋ.
2026 جىلى جوباعا جاڭا سەرىكتەستەر قوسىلدى. ولاردىڭ قاتارىندا FlyArystan اۋە كومپانياسى مەن EUROBAK ەۋروپالىق بيزنەس-قاۋىمداستىعى بار. وسى ارىپتەستىك اياسىندا قوسىمشا 55 گەكتار جەرگە 190 مىڭ كوشەت وتىرعىزۋ جوسپارلانىپ وتىر.
Halyk قورى جوبانىڭ باستاماشىسى عانا ەمەس، ونى ۇيلەستىرىپ وتىرعان نەگىزگى ۇيىم رەتىندە دە جۇمىس ىستەيدى. قور ەكولوگيالىق كۇن ءتارتىبى اياسىندا مەملەكەت، بيزنەس جانە قوعامنىڭ بىرلەسىپ ارەكەت ەتۋىنە مۇمكىندىك بەرەتىن تۇراقتى الاڭ قالىپتاستىرىپ وتىر. سونىڭ ارقاسىندا باستاماعا ەرىكتىلەر، ستۋدەنتتەر، كاسىپكەرلەر مەن قوعامدىق ۇيىمدار بەلسەندى قاتىسىپ جاتىر. كوكتەمگى اعاش ەگۋ جۇمىستارىنا Astana IT University ستۋدەنتتەرى، NNEF قوعامدىق قورىنىڭ قولداۋىمەن «ميراس» مەكتەبىنىڭ وقۋشىلارى، Halyk Bank قىزمەتكەرلەرى، سونداي-اق، ءوڭىر تۇرعىندارى اتسالىستى.
«بۇل - مەن ءۇشىن زور ماقتانىش. ءبىز بۇل باستاماعا جاي عانا اعاش وتىرعىزۋ ءۇشىن ەمەس، ەل بولاشاعىنا بەيجاي قارامايتىن ازامات رەتىندە كەلدىك. تابيعاتتى قورعاۋ ارقايسىمىزدىڭ بورىشىمىز»، - دەدى ميلليونىنشى كوشەتتى ەككەن Astana IT University ستۋدەنتى اسىلجان ابدۋللاەۆ.
تيمۋر قۇلىباەۆتىڭ Halyk قايىرىمدىلىق قورىنىڭ باس ديرەكتورى ساعىنبەك شۇنكەەۆتىڭ ايتۋىنشا، جوبا ۇزاق مەرزىمگە جوسپارلانعان.
«جوبانىڭ باستى ماقساتى - بەس جىل ىشىندە 9 ميلليون كوشەت پەن شىبىق ەگۋ. ميلليونىنشى كوشەت بيىلعى العاشقى ماڭىزدى بەلەس. ءبىز وسى باعىتتاعى جۇيەلى جۇمىسىمىزدى جالعاستىرا بەرەمىز. اسىرەسە، ەكولوگيا مينيسترلىگىمەن بىرگە قولعا العان باستامامىزعا حالىقارالىق جانە وتاندىق ۇيىمداردىڭ قولداۋ ءبىلدىرىپ جاتقانى كوڭىل قۋانتادى»، - دەدى ول.
ايتا كەتەيىك، «Halyk ورمانى» جوباسى 2025 جىلعى كۇزدە تيمۋر قۇلىباەۆتىڭ Halyk قايىرىمدىلىق قورى مەن ەكولوگيا جانە تابيعي رەسۋرستار مينيسترلىگى اراسىندا ىنتىماقتاستىق تۋرالى مەموراندۋمعا قول قويىلعاننان كەيىن باستاۋ العان. مەموراندۋم اياسىندا قور 1 ملرد تەڭگە ءبولىپ، «سەمەي ورمانى» مەملەكەتتىك تابيعي رەزەرۆاتى، ىلە-الاتاۋ ۇلتتىق تابيعي پاركى جانە ەلوردانىڭ «جاسىل ايماق» جاسىل بەلدەۋى اۋماقتارىندا 9 ميلليوننان اسا اعاش وتىرعىزۋدى جوسپارلاپ وتىر.
وسىلايشا، «Halyk ورمانى» جاي عانا ەكولوگيالىق جوبا ەمەس، ەلدىڭ ۇزاق مەرزىمدى دامۋ باعىتى جولىندا مەملەكەت، بيزنەس جانە قوعامدى بىرىكتىرەتىن تۇراقتى الاڭعا اينالىپ كەلەدى.
