قىرعىزستان سىرتقى ىستەر مينيسترلىگى ەۋروپالىق وداقتىڭ جاڭا سانكتسيالىق شەشىمدەرىنە بايلانىستى مالىمدەمە جاساپ، ەۋروپالىق وداق-تى ەكىجاقتى ستاندارتتار قولداندى دەپ ايىپتادى، دەپ حابارلايدى "ادىرنا" ۇلتتىق پورتالى.
بۇل تۋرالى 27 ساۋىردە جاريالانعان رەسمي مالىمدەمەدە ايتىلدى. مينيسترلىك بريۋسسەلدىڭ 20-سانكتسيالىق پاكەتىنە قىرعىزستاننىڭ بىرقاتار زاڭدى تۇلعالارىن ەنگىزۋىن جانە ەلگە قارسى «انتياينالىپ ءوتۋ مەحانيزمى» قولدانىلۋىن «وكىنىشتى جاعداي» دەپ باعالادى.
بىشكەك تاراپىنىڭ ايتۋىنشا، قىرعىزستان ەۋروپالىق ارىپتەستەرمەن تۇراقتى كەلىسسوزدەر جۇرگىزىپ، بارلىق سۇرالعان قۇجاتتاردى ۋاقتىلى ۇسىنعانىنا قاراماستان، ەلدىڭ ۇستانىمى ەسكەرۋسىز قالىپ وتىر.
سىرتقى ىستەر مينيسترلىگى مۇنداي بىرجاقتى شەكتەۋلەردىڭ ءۇشىنشى ەلدەرگە قىسىم جاساۋ تاجىريبەسىنە قايشى كەلەتىنىن اتاپ ءوتتى. سونداي-اق قىرعىزستان ءوز ارەكەتتەرىنىڭ ۇلتتىق زاڭناما مەن حالىقارالىق مىندەتتەمەلەرگە تولىق سايكەس ەكەنىن مالىمدەدى.
بىشكەك ەۋرووداقتان اشىق، كاسىبي جانە ساياساتتان تىس ديالوگ جۇرگىزۋدى، سونداي-اق بۇرىنعى كەلىسىمدەردى ءىس جۇزىندە ورىنداۋدى تالاپ ەتتى.
