قىرعىزستان پرەزيدەنتى سادىر جاپاروۆ شەتەلدە تۇرىپ جاتقان كەيبىر وتانداستارىن سىنعا الىپ، ەڭبەك ميگرانتتارىنىڭ ەل ەكونوميكاسىنا قوسىپ جۇرگەن ۇلەسىن اتاپ ءوتتى، دەپ حابارلايدى "ادىرنا" ءتىلشىسى.
24 kg دەرەگىنشە، ول تالاس قالاسىندا قىرعىزستان تاۋەلسىزدىگىنىڭ 35 جىلدىعىنا ارنالعان مەرەكەلىك شارادا ايتتى.
مەملەكەت باسشىسى سوزىندە جازۋشى شىڭعىس ايتماتوۆتىڭ شىعارماشىلىعىنا توقتالىپ، ونىڭ تۋىندىلارىنداعى ماڭگۇرت بەينەسى ارقىلى ادامنىڭ ءوز تاريحىن، ءتىلىن جانە مادەنيەتىن ۇمىتۋ ماسەلەسىن قوزعادى.
وسىدان كەيىن جاپاروۆ شەتەلدە جۇرگەن كەيبىر قىرعىزستاندىقتاردىڭ ەلدەگى وزگەرىستەرگە قاتىستى سىني پىكىرلەرىن ايتتى.
«كەيبىر ازاماتتارىمىز شەتەلدە ءجۇرىپ، سول جاقتان تاپقان ءبىر ءۇزىم نانى ءۇشىن ءوز ەلىندە بولىپ جاتقان جاقسى ىستەردىڭ وزىنەن ءمىن ىزدەپ، ماڭگۇرتتىك تانىتىپ ءجۇر»، – دەدى قىرعىزستان پرەزيدەنتى.
الايدا سادىر جاپاروۆ ناقتى كىمدەردى مەڭزەگەنىن جانە ولارعا قاتىستى قانداي دا ءبىر شارا قولدانىلاتىنىن ناقتىلامادى.
سونىمەن قاتار قىرعىزستان پرەزيدەنتى بىرنەشە ونداعان جىل بويى شەتەلدە تۇرىپ، ەڭبەك ەتىپ جۇرگەن وتانداستارىنا العىس ءبىلدىردى. ونىڭ ايتۋىنشا، ەڭبەك ميگرانتتارى سوڭعى 35 جىلدا ەل ەكونوميكاسىنىڭ دامۋىنا ۇلەس قوسىپ كەلەدى.
«سىزدەر كەيىنگى 35 جىل بويى قىرعىزستان ەكونوميكاسىنىڭ ءبىر بولشەگى بولدىڭىزدار. ول ءۇشىن قىرعىز مەملەكەتىنىڭ ءاربىر باسشىسى سىزدەرگە العىس ايتۋعا ءتيىس»، – دەدى سادىر جاپاروۆ.
پرەزيدەنت سونداي-اق قىرعىزستاندا وتكەن ءىرى حالىقارالىق ءىس-شارالاردان كەيىن شەتەلدەگى وتانداستارىنىڭ ەلگە دەگەن ماقتانىشى مەن ىقىلاسىنىڭ ارتقانىن اتاپ ءوتتى.
