شۆەيتساريا سوتى گۇلنارا كارىموۆاعا قاتىستى قىلمىستىق ءىستى جابۋ تۋرالى شەشىم قابىلدادى، دەپ حابارلايدى "ادىرنا" ۇلتتىق پورتالى.
بۇل تۋرالى شۆەيتساريانىڭ ۇلتتىق تەلەارناسى حابارلادى.
سوت ءىستى قاراۋعا «تۇراقتى كەدەرگى» بار ەكەنىن مويىندادى. اتاپ ايتقاندا، كارىموۆا وزبەكستان اۋماعىنان شىعا المايدى، ال وعان تاعىلعان ايىپتار بويىنشا ەسكىرۋ مەرزىمى اياقتالۋعا جاقىن. وسىعان بايلانىستى ءىستى ءارى قاراي قاراۋ زاڭدىق ءمانىن جوعالتقان.
سوت پروتسەسى شۆەيتساريانىڭ بەللينتسونا قالاسىندا باستالعان. ال كارىموۆا سوت وتىرىسىنا قاتىسا الماعان. وعان سەبەپ وزبەكستان بيلىگىنىڭ كارىموۆانى بوساتۋدان باس تارتۋى بولعان.
كارىموۆا 2014 جىلدان بەرى وزبەكستاندا قاماۋدا وتىر. قورعاۋشىلاردىڭ ايتۋىنشا، ول 2028 جىلدىڭ جەلتوقسانىندا نەمەسە ودان دا ەرتەرەك بوساتىلۋى مۇمكىن. الايدا سول ۋاقىتقا دەيىن شۆەيتسارياداعى ايىپتار بويىنشا ەسكىرۋ مەرزىمى ءوتىپ كەتەدى.
ادۆوكاتتار بۇل شەشىمدى اقتاۋ ۇكىمىمەن تەڭ دەپ باعالاپ وتىر. ولاردىڭ پىكىرىنشە، شۆەيتساريا سوتى ادامنىڭ نەگىزگى قۇقىقتارى ساقتالماعان جاعدايدا سىرتتاي سوت جۇرگىزۋگە جول بەرمەيتىنىن كورسەتتى.
ايتا كەتەيىك، كارىموۆاعا قاتىستى قىلمىستىق ءىس شۆەيتساريادا 2012 جىلى قوزعالعان. گۇلنارا كارىموۆا - وزبەكستاننىڭ بۇرىنعى پرەزيدەنتى يسلام كارىموۆتىڭ قىزى.
