بۇگىن «تازا قازاقستان» ەكولوگيالىق اكتسياسى اياسىندا ۇلىتاۋ وبلىسىندا «تۇلەكتەردىڭ اعاش ەگۋ» ەكو-چەللەندجى ءوتتى.
اتالعان باستاما «تازا قازاقستان» جالپىۇلتتىق باعدارلاماسى شەڭبەرىندە جۇزەگە اسىرىلىپ، وڭىردە ەكولوگيالىق مادەنيەتتى قالىپتاستىرۋعا باعىتتالعان ماڭىزدى جوبالاردىڭ ءبىرى بولىپ تابىلادى. اكتسيانىڭ ماقساتى – مەكتەپ تۇلەكتەرىن قورشاعان ورتانى قورعاۋعا تارتۋ، تابيعاتقا جاناشىرلىق كوزقاراس قالىپتاستىرۋ جانە ەكولوگيالىق جاۋاپكەرشىلىكتى ارتتىرۋ.
ءىس-شاراعا ۇلىتاۋ وبلىسى ءبىلىم باسقارماسىنا قاراستى اباي اتىنداعى مامانداندىرىلعان مەكتەپ-ينتەرناتى مەن №8 گيمنازيانىڭ تۇلەكتەرى بەلسەندى قاتىستى. جالپى 102 تۇلەك قاتىسىپ، 102 اعاش وتىرعىزدى.
اكتسيا بارىسىندا وقۋشىلار ءبىلىم بەرۋ ۇيىمدارىنىڭ اۋماقتارىندا، سونداي-اق جەزقازعان قالاسىنىڭ قوعامدىق كەڭىستىكتەرىندە اعاش وتىرعىزىپ، ءوڭىردى كوگالداندىرۋعا ءوز ۇلەستەرىن قوستى.
ايتا كەتۋ كەرەك، رەسپۋبليكا كولەمىندە ءوتىپ جاتقان «ەڭبەكقورلىق جانە كاسىبي بىلىكتىلىك ايى» اياسىندا وڭىردە تاربيەلىك جانە ەكولوگيالىق باعىتتاعى بىرقاتار ءىس-شارالار ۇيىمداستىرىلۋدا. اتاپ ايتقاندا، كىتاپ وقۋدى ناسيحاتتاۋ، تاريحي-مادەني مۇرانى ساقتاۋ جانە تابيعاتتى قورعاۋعا باعىتتالعان باستامالار جۇزەگە اسىرىلۋدا.
«تۇلەكتەردىڭ اعاش ەگۋ» ەكو-چەللەندجى – جاس ۇرپاقتىڭ ەكولوگيالىق مادەنيەتىن قالىپتاستىرۋمەن قاتار، ولاردىڭ تۋعان جەرگە دەگەن سۇيىسپەنشىلىگىن ارتتىرۋعا ىقپال ەتەتىن ماڭىزدى قادام.
