قازاقستان پرەزيدەنتى قاسىم-جومارت توقاەۆ رەسەيدىڭ ءسىم سەرگەي لاۆروۆتى قابىلدادى، دەپ حابارلايدى "ادىرنا" ۇلتتىق پورتالى.
كەزدەسۋ بارىسىندا مەملەكەت باسشىسى قازاقستان مەن رەسەي اراسىنداعى قارىم-قاتىناس ستراتەگيالىق سەرىكتەستىك جانە وداقتاستىق رۋحىندا دامىپ كەلە جاتقانىن اتاپ ءوتتى. سونىمەن قاتار ول جوعارى دەڭگەيدە قول جەتكىزىلگەن ۋاعدالاستىقتاردى ناقتى جۇزەگە اسىرۋدىڭ ماڭىزدىلىعىنا توقتالىپ، ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق بايلانىستاردى ودان ءارى نىعايتۋ قاجەت ەكەنىن جەتكىزدى.
تاراپتار ۆلاديمير ءپۋتيننىڭ مامىر ايىنىڭ سوڭىندا قازاقستانعا جوسپارلانعان ساپارىنا دايىندىق ماسەلەلەرىن تالقىلادى. پرەزيدەنت بۇل ساپاردى بيىلعى ەكىجاقتى كۇن تارتىبىندەگى باستى وقيعا رەتىندە باعالاپ، ونىڭ وداقتاستىق قاتىناستاردى نىعايتۋداعى رولىنە سەنىم ءبىلدىردى.
ءوز كەزەگىندە سەرگەي لاۆروۆ رەسەي پرەزيدەنتىنىڭ ساپارىنا دايىندىق بارىسى تۋرالى بايانداپ، قازاقستان مەن رەسەي اراسىنداعى كوپجوسپارلى ىنتىماقتاستىقتىڭ نەگىزگى باعىتتارى ۇكىمەتتەر مەن سىرتقى ىستەر مينيسترلىكتەرى دەڭگەيىندە پىسىقتالىپ جاتقانىن ايتتى.
كەزدەسۋ سوڭىندا تاراپتار حالىقارالىق جانە ايماقتىق كۇن تارتىبىندەگى وزەكتى ماسەلەلەر بويىنشا پىكىر الماستى.
