پولشا مەن بەلارۋس شەكاراسىنداعى تۇتقىن الماسۋ اياسىندا بۇعان دەيىن ۇستالعان قازاقستان ازاماتى بوساتىلىپ، ەلگە قايتارىلدى، دەپ حابارلايدى "ادىرنا" ۇلتتىق پورتالى.
بۇل تۋرالى پرەزيدەنتتىڭ ءباسپاسوز حاتشىسى ايبەك سمادياروۆ ءوزىنىڭ Telegram-ارناسىندا مالىمدەدى.
رەسمي اقپاراتقا سايكەس، پولشا اۋماعىندا ۇستالعان قازاقستان ازاماتى 28 ءساۋىر كۇنى بوستاندىققا شىققان. ونىڭ بوساتىلۋىنا مەملەكەت دەڭگەيىندەگى ديپلوماتيالىق كەلىسسوزدەر ىقپال ەتكەنى ايتىلدى.
مالىمدەمەدە قازاقستان پرەزيدەنتى قاسىم-جومارت توقاەۆ شەتەلدەگى ازاماتتاردىڭ قۇقىعى مەن مۇددەسىن قورعاۋ باعىتىندا دايەكتى جۇمىس جۇرگىزىپ كەلە جاتقانى اتاپ وتىلگەن.
"پولشا رەسپۋبليكاسىنىڭ اۋماعىندا بۇعان دەيىن تۇتقىندالعان قازاقستان ازاماتى بيىل 28 ساۋىردە بوستاندىققا شىققانى بەلگىلى. مۇنداي ناتيجەگە قاسىم-جومارت توقاەۆتىڭ قازاقستان ازاماتتارىن، سونىڭ ىشىندە شەتەلدەگى وتانداستارىمىزدىڭ قۇقىعى مەن مۇددەسىن دايەكتى تۇردە قورعاۋىنىڭ ارقاسىندا قول جەتكىزىلدى. مەملەكەت باسشىسى تاياۋدا بەلارۋس پرەزيدەنتى الەكساندر لۋكاشەنكومەن تەلەفون ارقىلى سويلەسىپ، كۇردەلى جاعداي كەزىندە ەكى ەل كونسترۋكتيۆتى تۇرعىدان ىنتىماقتاسا ارەكەت ەتكەنى ءۇشىن ريزاشىلىعىن ءبىلدىردى. سونىمەن قاتار، قازاقستان پرەزيدەنتى وڭتايلى ناتيجەگە قول جەتكىزۋگە ىقپال ەتكەن رەسەي پرەزيدەنتى ۆلاديمير پۋتينگە دە العىس ايتۋ ورىندى دەپ سانايدى. مەملەكەت باسشىسى پولشا پرەزيدەنتى كارول ناۆروتسكي مەن پرەمەر-مينيستر دونالد تۋسككە پولشا تاراپى بولعان جاعدايعا بايلانىستى بايىپتى شەشىم قابىلداعانى ءۇشىن ريزاشىلىعىن ءبىلدىرىپ، حات جولداماق", - دەلىنگەن حابارلامادا.
ايتا كەتەيىك، بۇعان دەيىن پولشادا شەتەلدىك بارلاۋ قىزمەتىمەن بايلانىسى بار دەگەن كۇدىكپەن قازاقستان ازاماتى ۇستالعانى حابارلانعان ەدى. پولشا قاۋىپسىزدىك ورگاندارى ونىڭ ناتو جانە وداقتاس قۇرىلىمدارعا قاتىستى اقپارات جيناۋى مۇمكىن ەكەنىن مالىمدەگەن.
ال ءساۋىر ايىنىڭ سوڭىندا بەرليندە رەسەي پايداسىنا تىڭشىلىق جاسادى دەگەن كۇدىكپەن قازاقستان ازاماتى بولۋى مۇمكىن تاعى ءبىر ادامنىڭ ۇستالعانى حابارلانعان. وعان قازاقستان سىرتقى ىستەر مينيسترلىگى سۇراۋ سالعان، بىراق گەرمانيانىڭ وعان قانداي جاۋاپ بەرگەنى ازىرگە بەلگىسىز.
