Polşa men Belarus şekarasyndaǧy tūtqyn almasu aiasynda būǧan deiın ūstalǧan Qazaqstan azamaty bosatylyp, elge qaitaryldy, dep habarlaidy "Adyrna" ūlttyq portaly.
Būl turaly Prezidenttıŋ baspasöz hatşysy Aibek Smadiiarov özınıŋ Telegram-arnasynda mälımdedı.
Resmi aqparatqa säikes, Polşa aumaǧynda ūstalǧan Qazaqstan azamaty 28 säuır künı bostandyqqa şyqqan. Onyŋ bosatyluyna memleket deŋgeiındegı diplomatiialyq kelıssözder yqpal etkenı aityldy.
Mälımdemede Qazaqstan Prezidentı Qasym-Jomart Toqaev şeteldegı azamattardyŋ qūqyǧy men müddesın qorǧau baǧytynda däiektı jūmys jürgızıp kele jatqany atap ötılgen.
"Polşa Respublikasynyŋ aumaǧynda būǧan deiın tūtqyndalǧan Qazaqstan azamaty biyl 28 säuırde bostandyqqa şyqqany belgılı. Mūndai nätijege Qasym-Jomart Toqaevtyŋ Qazaqstan azamattaryn, sonyŋ ışınde şeteldegı otandastarymyzdyŋ qūqyǧy men müddesın däiektı türde qorǧauynyŋ arqasynda qol jetkızıldı. Memleket basşysy taiauda Belarus prezidentı Aleksandr Lukaşenkomen telefon arqyly söilesıp, kürdelı jaǧdai kezınde ekı el konstruktivtı tūrǧydan yntymaqtasa äreket etkenı üşın rizaşylyǧyn bıldırdı. Sonymen qatar, Qazaqstan Prezidentı oŋtaily nätijege qol jetkızuge yqpal etken Resei prezidentı Vladimir Putinge de alǧys aitu oryndy dep sanaidy. Memleket basşysy Polşa prezidentı Karol Navroskii men premer-ministr Donald Tuskke Polşa tarapy bolǧan jaǧdaiǧa bailanysty baiypty şeşım qabyldaǧany üşın rizaşylyǧyn bıldırıp, hat joldamaq", - delıngen habarlamada.
Aita keteiık, būǧan deiın Polşada şeteldık barlau qyzmetımen bailanysy bar degen küdıkpen Qazaqstan azamaty ūstalǧany habarlanǧan edı. Polşa qauıpsızdık organdary onyŋ NATO jäne odaqtas qūrylymdarǧa qatysty aqparat jinauy mümkın ekenın mälımdegen.
Al säuır aiynyŋ soŋynda Berlinde Resei paidasyna tyŋşylyq jasady degen küdıkpen Qazaqstan azamaty boluy mümkın taǧy bır adamnyŋ ūstalǧany habarlanǧan. Oǧan Qazaqstan syrtqy ıster ministrlıgı sūrau salǧan, bıraq Germaniianyŋ oǧan qandai jauap bergenı äzırge belgısız.
