Qazaqstanda 2021 jylǵy ortasha zeınetaqy kólemi belgili boldy. Bıylǵy 1 sáýirindegi jaǵdaı boıynsha zeınetkerler sany 2 mln 247 myń adamdy quraǵan jáne ortasha zeınetaqy tólemi 100 163 teńge boldy, dep jazdy Stan.kz.
Qańtar-naýryz aılarynda bazalyq zeınetaqyny tóleýge respýblıkalyq bıýdjetten 205,8 mlrd teńge, yntymaqty zeınetaqyny tóleýge – 465,4 mlrd teńge baǵyttaldy.
Atap aıtqanda, naýryz aıynda respýblıkalyq bıýdjetten zeınetaqy tólemderine 223,8 mlrd teńge, onyń ishinde bazalyq zeınetaqyny tóleýge – 68,6 mlrd teńge, yntymaqty zeınetaqyny tóleýge – 155,2 mlrd teńge baǵyttaldy.
"2021 jylǵy 1 sáýirdegi jaǵdaı boıynsha zeınetaqy tólemderiniń ortasha mólsheri (bazalyq zeınetaqy tólemin eskere otyryp) 100 163 teńgeni qurady", – dedi QR Eńbek jáne halyqty áleýmettik qorǵaý mınıstrliginde.
Qazaqstanda 2018 jylǵy 1 shildeden bastap memlekettik bazalyq zeınetaqy tólemi árbir alýshyǵa onyń zeınetaqy júıesine qatysý ótilin eskere otyryp, jeke taǵaıyndalady. Zeınetaqy júıesine qatysý ótiline 1998 jylǵy 1 qańtarǵa deıin yntymaqty júıede jınaqtalǵan eńbek ótili de, sol kúnnen keıin de – mindetti zeınetaqy jarnalary (MZJ) tólengen kezeńder negizinde de engiziledi. Bul rette MZJ tóleýdiń bir aıy jınaqtaýshy zeınetaqy júıesindegi ótildiń bir aıy retinde eskeriledi.
Eger zeınetaqy júıesine 10 jáne odan az jyldy qurasa nemese múldem bolmasa, bazalyq zeınetaqy mólsheri eń tómengi kúnkóris deńgeıiniń 54% -na teń, odan ári 10 jyldan astam árbir jyl úshin onyń mólsheri 2% -ǵa ulǵaıady. Mysaly, 20 jyl qatyssa, bazalyq zeınetaqy eń tómengi kúnkóris deńgeıiniń 74%-yn, 30 jyl bolsa, eń tómengi kúnkóris deńgeıiniń 94% -yn quraıdy. Eńbek ótili 33 jáne odan kóp jyl bolǵan kezde ol eń tómengi kúnkóris deńgeıiniń 100%- y mólsherinde belgilenedi.
Aıta keteıik, mindetti zeınetaqy jarnalary qanshalyqty turaqty jáne tolyq kólemde tólense, azamatqa zeınetaqy jasyna jetken kezde bazalyq zeınetaqy tóleminiń mólsheri soǵurlym joǵary bolady.
Jasyna baılanysty zeınetaqy tólemderiniń mólsheri 1998 jylǵy 1 qańtardaǵy jaǵdaı boıynsha eńbek ótiline (keminde 6 aı talap etiledi) jáne zeınetaqy aldyndaǵy kezeńde alynǵan ortasha aılyq kiriske baılanysty bolady.
"Adyrna" ulttyq portaly
