اقش پرەزيدەنتى كونگرەسكە جولداعان حاتىندا يرانداعى اسكەري وپەراتسيالاردى جۇرگىزۋ ءۇشىن زاڭ شىعارۋشىلاردىڭ ماقۇلداۋى قاجەت ەمەس ەكەنىن مالىمدەدى، دەپ حابارلايدى "ادىرنا" ۇلتتىق پورتالى NBC News-كە سىلتەمە جاساپ.
اق ءۇي باسشىسىنىڭ حاتتارى وكىلدەر پالاتاسى مەن سەناتقا جولدانعان. وندا ترامپ قازىرگى اتىستى توقتاتۋ رەجيمى اقش-تىڭ اسكەري ارەكەتتەرىن جالعاستىرۋىنا نەگىز بولاتىنىن ايتقان.
پرەزيدەنتتىڭ مالىمەتىنشە، 2026 جىلعى 7 ساۋىردەن بەرى اقش پەن يران اراسىنداعى اتىس توقتاتىلعان جانە 28 اقپاندا باستالعان اسكەري قيمىلدار ۋاقىتشا توقتاعان. ول وسى كەزەڭنەن بەرى ەكى ەلدىڭ قارۋلى كۇشتەرى اراسىندا وق اتىلماعانىن اتاپ ءوتتى.
سونىمەن قاتار ترامپ يران تاراپىنان ءالى دە قاۋىپ بار ەكەنىن ايتىپ، اقش پەن ونىڭ اسكەرىنە تونەتىن قاتەردىڭ ساقتالىپ وتىرعانىن ەسكەرتكەن. ول كونگرەستى الداعى جاعدايلار تۋرالى حاباردار ەتىپ وتىرۋعا ۋادە بەردى.
الايدا زاڭ شىعارۋشىلار اراسىندا اقش-تىڭ اسكەري ارەكەتتەرىنە رەسمي رۇقسات بەرۋ ماسەلەسى قايتا كوتەرىلگەن. 1973 جىلعى سوعىس وكىلەتتىكتەرى تۋرالى رەزوليۋتسياعا سايكەس، اسكەري قاقتىعىس 60 كۇننەن ۇزاققا سوزىلسا، پرەزيدەنت كونگرەستىڭ كەلىسىمىن الۋى ءتيىس. دەگەنمەن ترامپ بۇل تالاپتى ءوز حاتىندا ناقتى قوزعاماعان.
جۋرناليستەر سۇراعىنا جاۋاپ بەرگەن پرەزيدەنت كونگرەستەن رۇقسات سۇراۋعا نيەتى جوق ەكەنىن ايتىپ، مۇنداي تاجىريبە بۇرىن دا بولماعانىن العا تارتتى.
